Hemserekê PYDyî Salih Muslimî hêrişê îşxalî yê dewleta tirke yê vera Rojawanî û rojdemê Rojhelatê Mîyanênî ANFyî rê ercnayî.
Muslimî dîyar kerd ke bi taybetî wextê Sovyetan de Tirkîya seba NATOyî bîya welatêko girîng. Muslimî da zanayene ke sermayeya globale serranê 90an de xîret kerd ke seba xo Tirkîya de aramîyêke biaferna. Muslimî vat: ”O çax Turgut Ozalî kerd ke seba plananê aramîye meseleya kurdan mîyanê Tirkîya de bêra çareserkerdene. La heyf ke no nêbi. Bingeyê pêro krîzan û bêaramîya Tirkîya de meseleya kurdan est a. Seba ke dewleta tirke na mesele çareser nêkerda asta globale de bin kewte. Sîyasetê Erdoganî yê ‘kurdî wa sîyasetê Komara Tirkîya qebul bikerê’ ra beno sebebê rijîyayîşî û netîceya nê sîyasetî de hem şarê kurdî û hem şarê Tirkîya yê bînî do bedelanê pîlan bidê.”
Muslimî bale ante şerê Îsraîl û Hamasî ser û vat: ”Seba Filîstîn û Îsraîlî modelê Îdareyê Xoserî çare yo. Ez vana hînî na meseleya Gazze do zaf çîyan bivurna. Beno ke no şer do giranêr bibo û xeylêk welatan ra vila bibo. Beno ke Lubnan, Misir û Urdun zî tewrê şerî binê. Axir do pêro hemsengîyê Rojhelatê Mîyanênî do bivurîyê.”
Salih Muslimî îfade kerd ke sîyasetê Erdoganî yê tewşî ra Tirkîya roje bi roje ver bi rijîyayîşî şina. Muslimî vat: ”Erdogan hetêkî NATO de hetê bînî ra Rûsya de têkilîyan keno ke kurdan çin bikero û meseleya kurdan çareser nêkero. Proje û sîyasetê Erdoganî ra Tirkîya krîzê ekonomîkî ancena, hînî îflas kerdo. Dîplomasîya mîyanneteweyîye de zî Tirkîya bawerî nêdana kesî. Erdogan Tirkîya kena qurbana menfaetanê xo. Tirkîya seba ke şerê vera kurdan bikera tewra NATOyî bîye. La kurdan şer de îsbat kerd ke ê do çin nêbê. Tirkîya bi nê hawayî rîyê hêzanê globalan ra zî bin kewte.
Dewleta tirke armanc kena ke Rojhelatê Mîyanênî de dewleta Osmanîyan û sîstemê ci gandar bikera. Dewleta tirle nê sîyasetî ra nika destê mafya, çete û bazirgananê narkotîkî de ya. Xora dewleta tirke pêro pereyê xo zî şerê vera kurdan de xerc kena. Nê rayîrî de seba nê şerî cerganê sey El Nûsra, DAIŞ, Heyîa Şamî ûsn. weye kena. Coka Tirkîya seba pêro dinya zî bîya tehlukeyêk. Sîyasetê Erdoganî bîyo sîyasetê şantajî.
Kurdî seserra 21ine ra nata rojdemê dinya de yê. Ewro dinya de qasê 50 mîlyon kurdî est ê. Kurdî ewro eşkenê tesîrê sîyasetê dinya bikerê. Ancî kurdî wayîrê projeyanê xurtan û pîlan ê. Hêzê globalî û hegemonîkî wazenê ke kurdî sey verî kole bibê. Coka ê vera projeyê Îdareyê Xoserî yê û paştî danê hêrişanê îşxalî yê dewleta tirke. La xoverdayîşê ma zî werte de yo. Xoverdayîşê hêzanê ma û şarê ma Rojhelatê Mîyanênî de bîyo nimûne. Çew nêeşkeno Îdareyê Xoserî çin bihesibno. Seba aramîya Rojhelatê Mîyanênî şert o ke Îdareyo Xoser do bişinasîyo. Hukmatê Şamî heta nika qet yew meseleya şaranê Sûrîye zî çareser nêkerd. Coka ganî hukmatê Şamî sîyasetê xo bivurno. Wextê ci ameyo ke hukmatê Sûrîye îdeolojîya xo bivurno.” ŞEHBA
