Hemserekê Komeleyanê Elewîyanê Demokratîkan (DAD) Mustafa Karabudakî derheqê nîjadperestîya ke Unîversîteya Koçî de qewîyaye de ANFyî rê qisey kerd.
Karabudakî bale ante ser ke kurd û elewîyî tim raştê polîtîkayanê zext, zulm û qirkerdişî yenê û vat: ”Semedê ma çîyo muhîm ziwanê hêrişkaran o. No hêrişê vera nasnameyêk û bawerîyêke yo. No vatişê nefretî yo, sûc o. Coka ma wayîrê mexdûrî vejîyayî. Xora hêrişê vera karkeranê kurdan, macîran û bitaybetî zî vera cinîyan pêro pabesteyê nê ziwanê nefretî yê. No serebûtêko normal nîyo. Her çîyo ke vera kurdan û elewîyan beno, bêceza yeno verdayene. No zî verê hêrişanê neweyan akeno. Ma nê tim ciwîyenê. Mesela vera cemxaneyê ma hêriş bi. Hêrişkar tehlîye bi. Dêsan de nuşteyî yenê nuştene vanê ‘domanan nuşto’, ‘serxoşêk nuşto’ û serê ci yeno girewtene. Ganî peyê nînan mero caverdayene.”
Mustafa Karaburdakî vera hêrişan bale ante muhîmîya yewîye û wayîrvejîyayîşê bawerî û nasnameyî ser û nê vatî: ”Seserra verêne ya komere de kurdî, elewî û heme ê bînî raştê qirkerdişan ameyî. Na seserra dîyine de zî do wina dewam bikero. Faşîzmê AKP-MHPyî neslêko kîndar veto werte. Meqes binena bîyo a. Verî zî hêriş û qirkerdişî bîyî qewimîyayî la nika no bîyo polîtîkaya dewlete. Verî dewlete xo têna kiştî ra ramojnayene la nika eşkera polîtîkaya dewlete est a. Polîtîkayê asîmîlasyonî zaf lez aver şinê. Dewlete bineyna taktîk bedilna. Nê semedî ra ganî ma zî zafêr rayapêroyîye afirne û rojdem de tepişê. Ganî ma wayîrê bawerî, nasname û cemxaneyanê xo bivejîyê.” ANQARA
