Semede weçînayîşê herêmî ke do 31ê de Adare de pê bêro, xeylê bajaranê Kurdistan de xîretkerdişê neqlkerdişê weçînitoxan dest pêkerd. Ame zanayîş ke qezayê Artemêtan û Tûşba ya Wanî de weçînitoxê zêde ameyî qeydkerdiş. Ame dîyarkerdiş ke taxa Beyuzumu ya Tûşbaye de awanîyêk mustakîl de keyeyo ke 4 kes tede ciwîyenê de sewbîna 8 kesê bînî yê bi peynameyê cîya ameyî qeydkerdiş.
Keyeyê Erolo ke keyeyê mustakîl de ciwîyeno dîyar kerd ke beşê cipersayîşê yê Persayîşê Weçînitoxê Mîyanên yê e-Dewlete de keyeyê înan sey ‘weçînitoxê ke eynî keye de ciwîyenê’ ca ameyo mojnayîş û nameyê 8 kesê cîya zî nê keyeyî de ameyî mojnayîş. Keyeyo ke mustakîl o û sey bîna ameyo mojnayîş de nameye sey, “Aydin, Çaglar, Duran, Furat, Yildiz, Sancak, Ozer” ca gênê.
Îtîrazê weçînitoxan rê cewabê ‘red’
Heto bîn ra ame zanayîş ke taxa Emînpaşa ya qezaya Artemêtî de zî keyeyêk mustakîl ke veng o, cor û cêrê ci rijîyayo û merdim nêeşkeno tede biciwîyo de weçînitox ameyî qeydkerdiş. Keyeyê Beyazpolatî ke beşe cipersayîşê weçînitoxan ê e-Dewlete ra rewşe ferq kerdî, Heyetê Weçînayîşî yê Qezaya Artemêtî rê seba qeydê nê weçînitoxan bêro piraberdiş îtîraz kerd. Serekatîyê Heyetê Weçînayîşî yê Berzî semedo ke keye serê keso ke eynî keyeyî ra yo û dinyaya xo bedelnayo, muracatê keyeyê Beyazpolatî red kerd.
Na rewşe ra dima keyeyê Beyazpolatî muracatê Komîsyonê Weçînayîşî yê DEM Partîye ya Wanî kerd û ame dîyarkerdiş ke DEM do na rewşe de îtîraz bikero. WAN
