DAIŞî 20ê çeleyê 2022yî de hêrişê taxa Xiwêranî ya Hesekê kerdbî. Fermandaranê YPJyî ra Gulbihare Kobanê ANFyî rê qala armancê hêrişan û têkoşînê vera DAIŞî kerde.
Gulbihare Kobanê ard ziwan ke dewleta tirke û hêzanê komplogeran seba ke verê averşîyayîşê Rojawanî bigêrê bi rayîrê cerganê DAIŞî xeylêk senaryoyî plan kerdê û vat: ”Serra 2020î de Xiwêran de senaryoyêko winayên qewimîya. Hêzanê ma ê hêrişî bin vistî. 20ê çeleyê 2022yî de DAIŞî bi plan û projeyê neweyî, bi hemkarî û perspektîfê dewleta tirke kerd ke newe ra hêrişê herême bikero.
Hêrişê vera Xiwêranî yanî hêrişê vera Zîndanê Sînaayê hêrişê plankerdeyî bîyî. Goreyê nê planî dewleta tirke Hesekê zî do îşxal bikerdêne. La nê planî derbêka girane werde. Zîndanê Sînaayê de 5 hezar cergê DAIŞî tepişte yê. Bi hêrişanê Xiwêranî zereyê zîndanî de zî serebûtî dîyayî destpêkerdene. Ame waştene ke herême de kaos bêro viraştene. La hêzanê ma YPG, YPJ û HSDyî pîya nê hêrişî şiknayî. Hêzanê ma hele bi hele rewşe teqîb kerde. Dewleta tirke, DAIŞ û hêzê mîyanneteweyîyî pabeyê ci nêbîyê ke hêzê ma na aste de cewab bidê.
DAIŞ dewleta tirke ra hêz û cesaretî gêno. La wextê hêrişanê Sînaayê de ame dîyene ters kewto zerrîya DAIŞî. DAIŞî dî ke seba ke gandar bibo ci rê paştdayîşê dewleta tirke qîm nêkeno. DAIŞî ancî fam kerd ke wexto ke YPG, YPJ û HSD dormeyê ci bigêrê nêeşkeno bi destekê hêzanê mîyanneteweyîyan û dewleta tirke xo bixeliso. A raşte mesuldarîya dewletan a ke hemwelatîyanê xo yê endamanê DAIŞî bigêrê, muhakeme bikerê. La na babete de xîretê înan kêm o. La dewletî zî DAIŞî sey bombaya gandare vînenê û welatanê xo de nêwazenê. Seba nînan aramîya herême ney aramîya welatanê xo girîng a.
Ma senî ke hêrişê DAIŞî yê Hesekê şiknayê ma do pêro hêrişanê vera herême wina bişiknê. Vera plananê gemarinan ma payan ser de û her wextî ra xurtêr ê.” HESEKÊ
