Xeylêk şaristananê Ewropa de kurdîstanijan û dostanê înan çarçewa kampanyaya ”Ma Zîndanê Îmraliyî rê 100 hezar kartpostalan bişawê” de kartî nuştî.
Şaristanê Strasbourgî yê Fransa de serkêşîya TJK-Fyî de kartî erşawîyayî. Çalakîye de ame parekerdene ke Rayberê Şarê Kurdî Abdullah Ocalan îradeyê şaran o û muxatabê çareserîya meseleya kurdan o. Kartan ser de mesajê ”Îradeyê ma Ocalan o” ame nuştene.
Şaristanê Parisî yê Fransa de keyeyanê çewlîgijan Merkezê Komelê Demokratîkî yê Kurdan de kombîyayîşêk kerd. Kombîyayîşî de bire dîyaye ke seba azadîya Ocalanî ganî kurdî bi xurtî tewrê kampanya û çalakîyan bibê. Dim bi hawayêkê komkîyî kartî erşawîyayî Îmraliyî.
Paytextê Brîtanya London de zî serkêşîya Meclîsê Şarê Kurdî û Meclîsê Cinîyan ê Jîyane de çalakîya kartan ameye kerdene. Xeylêk enternasyonalan zî paştî daye kampanya. Îmajmakera îtalyane Alessandra Battistonî beşdara kampanya bîye û vat ke aye kitabê Ocalanî wendê û 25 serrî yo heqê Ocalanî yenê binpaykerdene.
Aktîvîstê 76 serrî Jasper Allenî zî pare kerd ke azadîya Ocalanî seba demokrasî zaf girîng a.
Komelnas Dan Brownî îfade kerd ke azadîya Abdullah Ocalanî azadîya şarê kurdî û şaranê bindestan a û şermêk a ke o 25 serrî yo binê tecrîdê giranî de tepişîyeno.
