Recep T. Erdogan, di daxuyaniya piştî Civîna Bilind a Ewlekariyê ya 13’ê çileya 2024’an de, ev peyv bikar anî. Bi vê gotinê ve armanca wî ev bû: Kurdistanê weke cih û warê teroristan, weke welatê teroristan nîşan bide.
Bi vê gotinê re êdî ne bi tenê Tevgêra Azadiya Kurdistanê, belê bi tevayî Kurdistanê dijmin nîşan dide û her wiha ne bi tenê mirovan; jin, mêr, kêç, kur, zaro û mezinan, belê li gel mirovan hemû xwezaya Kurdistanê; ajal, dar, ber, av û hewa bi giştî dike dijmin.
Ma jixwe vê dema dawî, êdî di kiryarî de wisa nake?
Ne bi tenê kargeh, xwaringeh, vexwaringeh, xwendingeh, nexweşxane û hwd. belê li gel gund û bajarên niştecihên gel, cihên xaz û neftê, hemû deşt û ciyayên Kurdistanê jî bombebaran nake?
Ka em bala xwe bidin peyva terorê jî!
Çavkaniya vê gotinê, ji zimanê fransî tê û wateya wê kotekî, zorakî, afirandina tirsê, şiddet û hwd. e.
Çavkaniya gotina ‘istan’, ji zimanê farisî tê û wateya wê niştecih, eyalet, warnişîn û hwd. e. Mînak; istana Belûcistan, istanê Kurdistan û hwd.
Îca gelo armanca kê ye ku Kurdistanê bike “teroristan” an jî bike goristan? Bê şik û guman serkêşên van peyvan û van karên dijî mirovahî û ekolojiyê Recep û Bahçeli ye.
Jixwe berî Kurdistanê, wan ev nav û naverok misoger kirine; nav koşk an jî qesrên Receb û naveroka wê jî bi terorizmê di 1200 odeyan de tije terorist kirine.
Bi gotinek din; teroristan a bêqusûr ew qesra Recep a 5 Tepe ye û mîna Zîgûrata Sûmeran kar dike.
Mirov dikare ji qesra wî re bêje mikro anjî maketa teroristan!
Lê belê, wisa diyar e bi mikro û maket ranawest e, çavê wî li makro û mega teroristan e!
Ev jî tê wateya ku Tirkiyeyê bike cihê teroristan an bi vê jî raneweste hinek welatên din jî, mîna zincîrmarketan; Iraq, Îran, Sûriye, Azerbeycan, Ermenistan û hwd. bike zincîr-teroristan!
Îca ji mêj ve ye Recep Erdogan û palpiştên wî hegemonên cîhanî, hewl didin ku Kurdistanê bikin cehenem/dojeh an jî bi zimanê Recep “teroristan”, lê bi ser neketin.
Gelo çima?
Ji ber ku Kurdistan xwedî dîrokek dûr û dirêj a tije rûmetên mirovahiyê ne. Jixwe li gorî dîroknasan, cîh û warê destpêkê niştecihbûna mirovahiyê ye.
Pênc hezar sal in ku li ser vê erdnişînê, şer û ceng heye di navbera serdest û bindestan, zalim û mezlûman de.
Kurt cewherî, li ser Kurdistanê, ewqas êrîşên talanker, qirker û dagirker ên imparator û qralên biyanî hatin meşandin, lê nikarîbûn bi ser bikevin. Her wiha gelên Kurdistanê bi berxwedanên destanî, karibûn welat û rûmetên xwe yên mirovahî bi parêzin.
Bi ewqas plan û projeyên bi hostayiyên mezin li Zîguratên Sûmeran hatin amadekirin û bi hezar salan li ser gelên Kurdistanê hatin meşandin, nikaribûn nav û naverok û hêjayên gelê Kurdistanê bi yekcarî ji holê rakiran, îca gelo Recep ê çawa karibe bi van peyvên xwe yên bêbingeh, van rûmetên dîrokî yên Kurdistanê tune bike?
Tê zanîn hinek bapîrên Recep jî, mîna wî armanc dane ber xwe û gotin ‘me Kurdistan xiste bin xaka Çiyayê Gilîlê, me ser wê beton kir, êdî kes nikare wê rizgar bike!’
Ê baş e, ma êdî dinya alem, raya giştî cîhanê hemû pê hesiya ku Hêzên Tevgêra Azadiya Gelê Kurdistanê, bajarê Reqayê ku paytexta teroristan a DAIŞ’ê bû hilweşandin.
Her wiha tê zanîn ku giraniya fermandarên vê koma terorîst DAIŞ’ê, li teroristan (Zîgurata-Seraya) a Recep a Bêştepe ji aliyê mamosteyên wî yên terorîst ve dihatin perwerde kirin û hîn jî tên perwerde kirin!
Ev yek jî baş tê zanîn ku, gerîla û têkoşerên Tevgêra Azadiya Gelê Kurdistanê, bi gelê xwe yê welatparêz re, di çarçova fikir û ramanên Rêber Apo de, wê her têbikoşin heta Kurdistanê azad bikin û Kurdistanê bikin bihuşt/cunet.
De bila Recep û mamostayên xwe yên teroristên qesrê jî, li ser planên xwe yên bê bingeh ên derewîn xebata xwe dewam bikin.
Ew ên biçin dojeha/cehennema xwe ya teroristana şerxwaz, gelê Kurdistanê jî wê biçe bihuşta/cuneta xwe ya Kurdistana aştîxwaz!
