35 baroyan ra 300 avûkatan seba ke Rayberê Şarê Kurdî Abdullah Ocalanî reyde pêvînayîş bikerê, muracatê Wezîrîya Edaletî kerd.
Komeleya Huqûqnasan a Seba Azadîye (OHD) , Komeleya Huqûqnasanê Modernan (ÇHD) zî tede xeylêk avûkatê baroyan û dezgehanê heq û huqûqî derheqê muracatî de verê Edlîyeya Dîyarbekirî de eşkerayîye daye. Wekîlanê DEM Partî George Aslan, Saliha Aydeniz û Serhat Eren, Newroze Uysal Aslan, Dilane Kunt Ayan, Cengiz Çiçekî zî paştî daye eşkerayîye.
Eşkerayîya hempare hetê Sereka Pêroyî ya OHDyî Ekine Yeter ra ameye wendene. Eşkerayîye de nê ameyî vatene:
”Seke yeno zanayene Birêz Abdullah Ocalan, Birêz Omer Hayrî Konar, Birêz Hamili Yildirim û Birêz Veysî Aktaş yê ke Zîndanê Îmraliyî de yenê tepiştene, pêvînayîşê înan bi avûkatan û merdimanê înan yeno astenkerdene û huqûq yeno binpaykerdene. Seke ma zaf rey verî zî vat Abdullah Ocalan7ê tebaxa 2019î ra nata û tepişteyê bînî yê Îraliyî 2015î ra nata nêeşkenê avûkatanê xo reyde pêvînayîş bikerê.
Komîteya Vergirewtişê Îşkenceyî (CPT) raporê xo yê zîyaretê 2019yî de yo ke 2020 de ame eşkerakerdene,vat tekîlîya Abdullah Ocalan û tepişteyanê bînan ê Îmraliyî bi temamî teberî ra ameya qerfnayene û no sey rewşa ‘incommunicado’ (bêtekîlîya qetî) amebi erjnayene.
Ma reyna fînenê vîrî ke Îmrali de têna huqûqê zereyî nê huqûqê mîyanneteweyî zî yeno binpaykerdene. Ma 2022 de 29 baroyan ra 775 avûkatan muracatê Serdozgerîya Komare ya Bursa û Îdareyê Zîndanê Îmraliyî kerd la muracatê ma bêcewab ame verdayene. Reyna sere de Ewropa 22 welatanê cîyayan ra 350 avûkatan û dima ra Rojhelatê Mîyanênî ra 756 avûkatan zî muracatê Wezîrîya Edaletî kerd la muracatê înan zî bêvewab ame verdayene. Ma ewro newera semedê pêvînayîşê Îmraliyî muracatê Wezîrîya Edaletî kerd. Ma sey 330 avûkatan ê 35 baroyan reyna veng danê ke wa na bêhuqûqîye biqedîyo, tecrîd bêro wedaritene.”
