Bi wesîleya serrgêra Komployê 15ê Sibate yê vera Rayberê Şarê Kurdî Abdullah Ocalanî 17ê sibata 2024î de Almanya de rayraşîyayîşêko merkezî do bêro kerdene. Hemsereka KCDK-E Zubeyde Zumrut bi vîdeoyêkî venga pêro kurdîstanijan û dostanê înan da ke wa tewrê rayraşîyayîşî bibê.
Zubeyde Zumruta ke beşdaranê Rayraşîyayîşê Dergî yê 25 rojan ra yew a, no vengdayîş kerd:
”Ma bi rayraşîyayîşêkê tarîxîyî şinê. Rayberîya ke 25 serrî yo Zîndanê Îmraliyî de tepişîyeno seba kurdan kesêko tarîxî yo. Şarê ma nê esaretê 25 serran qebul nêkeno. Ma 10ê teşrîna verêne de Hemleya ‘Abdullah Ocalanî rê Azadîye, Meseleya Kurdan rê Çareserîya Sîyasîye’ dabî destpêkerdene. Rayberê ma ra 3 serrî yo xeberêke nêna girewtene. Çîyê ke Îmrali de qewimîyenê qesawetê ma zêdînenê. Ma erkê CPTyî û Mehkemeya Hqanê Merdiman visnenê vîrî. Ganî cade seba Rayberîye gamî bierzîyê. Ma do bi ruhê seferberîye tewrê hemle bibê û Rayberê xo azad bikerê. Ganî bi se hezaran kesî beşdarê rayraşîyayîş û mîtîngê Kolnî bibê. Senî ke ma 1999 de heta Roma rayraşîyayîş kerd, senî şarî o çax înîsîyatîf girewt xo ser; ganî ancî şar pabeyê çewî nêbo. Bêrê 17ê sibate de ma pîya bibê. Heta ke Rayberîye azad nêba cinî, ciwanî zî azad nêbenê. Ma 17ê sibate de, do Koln de pabeyê şima bê. PARÎS
