Merkezê Îrtîbatî û Çapemenîye yê HPGyî derheqê çalakîyanê gerîlayan û hêrişanê artêşa tirke PDKyî de eşkerayîya nuştekîye daye û nê vatî:
”Herêma Zapî;
23ê çeleyî de Warê Xoverdayîşî yê Girê Cûdîyî de îşxalkeranê ke xebata ronayîşê mewzîyan kerdêne bi çekanê giranan ameyî pirodayene û xebata înan ameye vindarnayene. 24ê çeleyî de Warê Xoverdayîşî yê Girê Amediyê de îşxalkerî bi çekanê otomatîkan ameyî pirodayene, mewzîyêke ameye derbkerdene.
Herêma Xakurkê;
24ê çeleyî de de Girê Şehîd Kamûran û Girê Şehîd Heqî de îşxalkerî bi çekanê giranan ameyî pirodayene. Çalakîya Girê Şehîd Kamûranî hetê Hêzanê ma yê YJA Starî ra ameye kerdene.
Çekê qedexeyî;
23ê çeleyî de Warê Xoverdayîşî yê Girê Cûdîyî yê Zapî de mewzîyê ma yê şerî bi droneyê teqaber barkerdeyî dîyaye bombayan ver.
Bombarduman
21, 22, 23, 24 û 25ê çeleyî de warê Deşta Kafya yê herêma Garê, warê Dergelê, Serê Metîna, Beşîlî yê herêma Metîna,warê Geliyê Lolanê, Sinînê yê herêma Xakurkê, Warê Xoverdayîşî yê Girê Bahar ê Zapî 26 rey bi teyarayanê şerî dîyayî bombayan ver. 24ê çeleyî de herêma Xakurkê bi helîkopteran dîyaye bombayan ver. Reyna herêmê Zap, Xakurkê û Metîna dîyayî topan ver.
Hêrişê PDKyî de 2 gerîlayî birîndar bîyî
24ê çeleyî de saetanê nêmroje de hêzê ma yê ke bi 2 wesayîtan ver Girê Amediyê şîyênî mintiqaya Sergelê de ginayî xapê PDKyî ro. Wesayîtê PDKyî yo ke serê ci de doçka bibi û rayîrî ser o hêzê ma pawitene, hêrişê hêzanê ma kerd. Hêzê ma zî wesayîtî ra ameyî war û cewab da. Wextêk pêkewtiş qewimîya. Nê mabênî de teyarayê keşîfî yê tirkî zî kewtî dewre. Netîceya hêrişê hêzanê PDKyî de 2 embazê ma birîndar bîyî. Reyna netîceya darban de wesayîtê ma zî xeripîyayî û herindê xo de mendê. Dima ra teyarayanê şerî wesayîtê ma dayî bombayan ver. Serabûte wina qewimîyaye.
Eşkerayîyê Wezîrîya Karanê Zereyî bi temamî zûr ê
Eşkerayîya ke derheqê na babete hetê Wezîrîya Karanê Zereyî ra ameye dayene bi temamî xelat a. Seba ke hêzê ma ginayî xapî ro pêkewtişî dest pêkerd. Ma vera dewleta tirke, îşxalkeranê Kurdîstanî têkoşîn kenê. Wextê winayênî de hêzêkê kurdan seba ke xizmetê îşxalkeran bikero vejîyeno rayîrê ma ser. No şerm o. Ma hêvî kenê ke çîyo winayên reyna nêqewîmîyo. Ma do rixmê her çîyî hetê xo ra berpirsîyarîya xo bîyarê ca.” BEHDÎNAN
