Seba azadîya Rayberê Şarê Kurdî Abdullah Ocalanî û çareserîya meseleya kurdan şaristananê Vakurê Kurdîstanî de mabênê 1-15ê sibate de ‘Rayraşîyayîşê Azadîye yo Pîl’ do bêro kerdene.
Bi beşdarîya Hemvervatoxê HDKyî Cengîz Çîçek, Hemserekanê DBPyî Keskîn Bayindir û Çîgdem Kiliçgun Uçar û wekîlanê DEM Partî, Amed de derheqê babete de kombîyayîşê çapemenîye ame kerdene.
Wekîla DEM Partî Bêrîtan Guneş dîyar kerd ke 75 aktîvîstê heqanê merdiman zî do tewrê rayraşîyayîşî bibê.
Keskîn Bayindirî eşkerayîya çapemenîye wende. Bayindirî da zanayene ke Rayraşîyayîşê Azadîye yo Pîl 1ê sibate de do dest pêbikero û heta 15ê sibate serrgêra Komployê Mîyanneteweyî dewam bikero.
Bayindirî vist vîrî ke Rayberê Şarê Kurdî Abdullah Ocalanî ra 1037 rojî yo xeberêke nêna girwtene û tecrîdê Îmraliyî vilayê pêro welatî bîyo. Bayindirî îfade kerd ke bi tecrîdê Îmraliyî verê çareserîya meseleya kurdan zî yena girewtene. Bayindirî vat: ”Welat mîyanê krîz û şerî de yo. Seba ke nînan ra welat bixelisîyo ganî Birêz Ocalan azad bibo. Tecrîd meseleya kurdan bêçare verdeno û şerî, krîz û kaosî ferz keno. Azadîya Birêz Ocalanî yena manaya çareserîya deokratîke ya meseleya kurdan. Birêz Ocalanî tim ardbi ziwan ke o seba çareserîya meseleya kurdan amade yo.
Ewro komel her wextî ra zafêr hewceyê tewirê haştîye yê Birêz Ocalanî yo. Seba ke tecrîd wedarîyo û Birêz Ocalan azad bibo 10ê teşrîna verêne ya 2023yî de 74 merkezanê dinya de Hemleya ‘Abdullah Ocalanî rê Azadîye, Meseleya Kurdan rê Çareserîya Sîyasîye’ dîyabî destpêkerdene. Çarçewa na hemle de 1ê sibate ra heta 15ê sibate şaristananê Vakurê Kurdîstanî de ‘Rayraşîyayîşê Azadîye yo Pîl’ do bêro kerdene. Ma venga pêro şarê kurdî, dostanê kurdan û rayaumûmîya demokratîke danê ke bi xurtî tewrê nê rayraşîyayîşî bibê.”
Wekîlê DEM Partî Sînan Çîftyurekî kombîyayîş de qisey kerd û da zanayene ke tecrîdê Îmraliyî bêhuqûqî yo û ganî vera nê tecrîdî her kes têbigêro. Çîftyurekî vat: ”Ma do vera tecrîdî nê rayraşîyayîşî bikerê. Ma venga dewlete û sîyasetmedaran danê ke wa sîyasetê tecrîdî ra fek vera bidê. Seba çareserîya meseleya kurdan wa Birêz Ocalan qisey bikero.”
Hemserekê MED TUHAD-FEDî Kerem Canpolatî zî dîyar kerd ke heta ke tecrîd biqedo têkoşînê înan do dewam bikero. AMED
