Bi destpêkirina, serhildana gel a li Sûriyeyê ya di sala 2011’an, li Rojava jî şoreşa gel ya bi pêşengiya jin û ciwanan destpê kir. Di nava demeke din de, li Rojava rêveberiya siyasî û civakî û ya herî girîng jî hêza parastina gel hat avakirin. Ev hêza bi hejmareke kêm, lê xwedî vîn û biryar bi demê re veguherî artêşa azadkirina rûmeta mirovahiyê.
Di sala 2014’an de çeteyên DAIŞ’ê bi alîkariya dewleta tirk ya dagirker êrîşî Kobanê ya rojavayê Kurdistanê kirin. Piştî berxwedana dîrokî û bêhempa ya gel û şervanên azadiyê ya li dijî êrîşên giran li ber xwe da û piştî 134 rojan ango di 26’ê Çileya 2015’an de Kobanê bi temamî ji çeteyan hat paqijkirin û navê xwe li dîrokê neqişand.
Di vê berxwedana dîrokî de jinên têkoşer pêşengtî kirin. Çîroka hêz û baweriya azadiya xwe û gelê xwe ji nû ve nivîsandin, ku di encamê de dagirkerî têk çû û karîbû rêya têkoşîn û azadiyê ji jinên cîhanê re ronî bike.
Kobana ku heta wê rojê ji hêla cîhanê ve nedihat nasîn, bi lehengiya Şervanên mîna Arîn, Gelhat, Zozan, Zehra û Hebûnan bû qibleya mirovahiyê.
Li Kobanê şerekî dijwar û berxwedaneke dîrokî hat kirin. Hêzên Parastina Gel û jinên têkoşervan li dijî êrîşa çeteyên DAIŞ’ê re ku ji bo hemû cîhanê xeteriyeke mezin çêkir, bûn sembola têkoşîn û lehengiyê. Bi pêşengtiya jinên kurd û şervanên YPJ’ê li Kobanê destanek hat nivîsandin.
Kobanê bû kelha berxwedanê û kurd, jinên kurd û pirsgirêka kurd bi cîhanê da naskirin. Ji ber vê yekê hemû gelên cîhanê ji bo belavkirina aştiyê û piştgirîkirina vê berxwedanê bûn yek.
Pêşengiya jinan a di şerê Kobanî de dengdanek mezin a cîhanî li pey xwe anî û bala jinên cîhanê kişand ser xwe. Di çarçoveya bandora ku pêşengtî û têkoşîna jinên kurd ji berxwedana Kobanê re kirî de, di 15’ê Sibata sala 2015’an de serokkomarê wê demê yê Fransayê François Hollande li koşka Elyseeyê bi cil û bergên leşkerî pêşwaziya Fermandara Giştî ya wê demê ya YPJ’ê Nesrîn Ebdullah û hevseroka berê ya PYD’ê Asya Abdullah, kir. Di dîroka Fransayê de cara yekem bû kesek biyanî bi cil û bergên leşkerî biçe nav koşka serokatiya Fransayê.
Di 14’ê adara sala 2016’an de peykerê jina azad Baldar ku nûnertiya azadî û lehengiya jinên kurd ên şoreşger û têkoşer dike, li meydana Kobanê hate danîn. Peykerê jina azadîxwaz ya bi bask sembola têkoşîna jinên kurd e. Ev peyker ji bo hemû kesên ku beşdarî şerê Kobanê bûne û li berxwe dabûn, sembol û diyariya Silêmaniyê bû.
Di destana dîrokî ya Kobanê de navê bi dehan fermandar û şervanên jin derket holê ku dê qehremaniya wan her dem di rûpelên dîrokê de bimîne. Jinên ji bakur, başûr, rojhilat û rojavayê Kurdistanê, di Kobanê de kom bûn û pêşengiya yekbûna Kurdistanê di Kobanê de nîşan dan. Hinek ji wan şervan û fermandarên nemir ên berxwedana Kobanê Zehra Penaber, Viyan Peyman, Rêvan Rojava, Arîn Mîrkan û Destîna Qendîl bedenên xwe kirin pira mayîndekirina azadiyê û bûn efsaneyên dîroka nûjen.
