Endama Konseya Ferandarîye ya YJA-Starî Arjîn Dêrsime bernameyê taybetî yê Stêrk TVyî de derheqê polîtîkayanê şerê taybetî yê dewleta tirke de qisey kerd.
Qiseykerdişê Arjîn Dêrsime ra tay noqtayê girîngî wina yê:
”Polîtîkayê şerê taybetî yê dewleta tirke hetê AKP-MHPyî ra yenê caardene û bi nê polîtîkayan yeno waştene ke îradeyê kurdan bêro çinkerdene. Dewleta tirke bi mîlyonan merdimî qetil kerdî û hema zî kena ke komelî qir bikera. Dewleta tirke Seyîz Riza bi metodê şerê taybetî tepiştbi. Wextê Terteleyê Dêrsimî de zî metodê gemarinî yê şerê taybetî şuxilîyayî. Dewlete kerd ke Dêrsim cewherê ci ra dûrî bivisna. Darbeya 12ê Êlule ra dima dewlete narey Kurdîstan de JÎTEM, kontragerîla, Hîzbulkontrayî ûsn. vistî dewre. 2002 ra nata îqtîdarê AKPyî û Erdogan polîtîkayanê şerê taybetî anê ca.
Tarîxê dewleta tirke de derheqê şerê taybetî de sey Erdoganî pisporêko bîn ê şerê taybetî nêdîyayo. Erdogan medya ra heta artêşe raranê kultur û hunerî ra heta waranê bînan her cade metodanê şerê taybetî şuxilneno. AKP-MHP û dewleta tirke kenê ke bi polîtîkayanê şerê taybetî têgêrayîşê ma, şarê ma û pêro destkewteyanê ma çin bikerê.
Ewro Rayber Apo çarçewa polîtîkayanê şerê taybetî de zîndan de yeno tecrîdkerdene. Dewleta tirke û rejîmê AKP-MHPyî tewr zaf vera Rayberîye metodanê şerê taybetî şuxilnenê. Rayberîye ra dima zî ciwan û cinîyî tewr zaf benê hedefê nê polîtîkayan. Mîyanê cinî û ciwananê ma de şuxilnayîşê madeyanê tîryakî yenê vilakerdene. Seba ke nê polîtîkayî bêrê pûçkerdene ganî ciwan û cinîyî bibê wayîrê ferasetî û xo perwerde û rêxistin bikerê. Ganî şarê Kurdîstanî verê polîtîkayanê şerê taybetî de baldar bibo. Ganî mîyanê komelî de kesê ke rêxistinkerde nîyê nêmanê.” BEHDÎNAN
