Hemsereka Sendîkaya Karkeranê Weşîye (SES) ya Amedî Yildiz Ok Orake derheqê meseleyanê warê weşîye de ANFyî rê qisey kerd.
Orake ard ziwan ke prosesê janê Korona de pêro sîstemê weşîye qelsîya xo eşkera kerde û meseleyê weşîye yewver vejîyayê werte. Orake vat: “Hem meseleyê xebatkaranê weşîye hem zî meseleyê hemwelatîyan zaf ê. Mîsal Erxenî de ma şîyî Nêweşxaneyê Dewlete. Rojane de hezar û 500 nêweşî şinê servîzê lezabezî la servîsê lezabezî bîyo sey polîkîlînîkî. Hemwelatîyî nêeşkenê randevuyî bigêrê. Herêma ma de xeylêk merdimî tirkî nêzanê û nê nêeşkenê bi rayîrê onlineyî û telefonî randevuyî bigêrê. Coka merdimî neçare manenê ke şorê servîsê lezabezî û uca ra sewqê doktoran bibê. Yanî sîstemê weşîye rijîyayo.”
Ganî kêmasîyê nêweşxaneyan bêrê peydakerdene
Orake dewamê qiseykerdişê xo de vat: “Nika herême de janêko cidî est o. La heyf ke nêweşan rê xizmet nêno dayene. Verê cû fîşê tesbîtkerdişê keyeyî, merkezê weşîye, xizmetê weşîye yê keyeyan est bîyî. Ganî ma ancî abigêrê ê sîstemî. Ganî ma meseleyan ser de vinderê. Amed hetê nêweşanê kanserî ra rêzê yewinî de yo. Çunke kontrolî nênê kerdene. Ganî herême de hûmara xebatkaranê weşîye bêra zêdînayene. Ganî kêmasîyê nêweşxaneyan bêrê peydakerdene. Seba ke şarî rê xizmetê weşîye bêro kerdene ganî gamê cidîyî bierzîyê.”
Ganî na budçe bêra zêdînayene
Orake pare kerd ke budçeya ke seba weşîye dîyena kişte kêm a û ganî na budçe bêra zêdînayene û vat: “Ma sendîkaya komelî yê. Vera neheqîyanê serê xebatkaranê weşîye û nêweşan ma têkoşîn kenê. Ma xora kêmasîya dewlete eşkera kenê. La naye ra ma yenê surgunkerdene û karî ra yenê vetene.” AMED
