Konferansa Azadiya fîzîkî ya Rêber Abdullah Ocalan bi dirûşma “Bi felsefeya Jin, Jiyan, Azadî em ê azadiya fîzîkî ya Rêber Apo misoger bikin” li Hola Mişwar a li Reqayê dest pê kir.
Konferans ji aliyê Kongra Star û Kombûna Jinan a Zenûbiya ve hatiye organîzekirine. Endamên her du saziyan, Meclisa Jinan a Sûriyeyê, nivîsgehên jinan ên partiyên Reqayê, nûnerên Rêveberiya Xweseriya Demokratîk a Bakur û Rojhilatê Sûriyeyê, tevger û rêxistinên jinan ên herêmê tev lê bûn. Her wiha kesayetên serbixwe, wêjevan, helbestvan û bijîşkên jin, hin mêvan ji Şamê, Hims, Hema û Laziqiyeyê tev li konferansê bûne. Dê ji Başûrê Kurdistanê û Rojhilat dê tevlêbûn bi rêya Zoomê çêbe.
Di konferansê de dê mijarên sereke wekî `Encamên Komploya Navneteweyî û bandorên wê li rewşa siyasî`, `Sûcên li dijî Rêber Abdullah Ocalan li gorî pîvanên navneteweyî` û ’ Pêngavên ji bo azadiya fîzîkî ya Rêber Abdullah Ocalan` bên nîqaşkirin.
Di konferasê de hevseroka Komîteya Perwerde û Fêrkirinê ya kantona Reqayê Zelîxe Ebdî axivî û got: “Em di pêvajoyeke dîrokî re derbas dibin. Me bersivandina berxwedanê û parastina destkeftiyan ragihand. Îro jî li vê holê pêkhateyên ku li hember rêxistina herî terorîst (DAIŞ) li ber xwe dane û bi ser ketine, kom bûne.”
Zelîxe hişyarî da ku dewleta Tirk ji DAIŞ`ê xeternaktir e û wiha domand: “Dewleta Tirk çavnebariyên xwe li Rojhilata Navîn aşkera kirin û li herêmên ku dagir kirine komkujî kirin. Gelek dewletan komkujiyên li Efrîn, Serêkaniyê û Girê Spî nas kirin.”
Zelîxe Ebdî destnîşan kir ku dewleta tirk dê negihêje armanca xwe û anî ziman ku projeya neteweya demokratîk bersiva siyasetên dagirkirinê ye.
Ji bo têkbirina Komploya Navneteweyî, Zelîxe Ebdî ev bang kir: “Ji bo ku em komployê têk bibin, divê jin dengê xwe bikin yek û bi hev re ji bo azadiya fîzîkî ya Rêber Abdullah Ocalan tê bikoşin.”
Hevseroka Komîteya Perwerde û Fêrkirinê ya kantona Reqayê Zelîxe Ebdî soza mezinkirina têkoşînê û şopandina xeta şehîdan ta rizgarkirina herêmên dagirkirî da.
Konferans bi axaftina endama Tevgera Hîlala Zêrîn a Çanda Jinan û helbestvan Medya Silêman û nîqaşkirina mijarên navborî berdewam e.
