Sereka Koma Die Linke ya Eyaletê Hamburgî Cansu Ozdemîr derheqê tecrîdê vera Rayberê Şarê Kurdî Abdullah Ocalanî û rayraşîyayîşê Kolnî yê 17ê sibate de ANFyî rê qisey kerd.
Ozdemîre vist vîrî ke Rayberê Şarê Kurdî 25 serrî yo tecrîdkerde yo û pare kerd ke seba ke verê vilabîyayîşê fikrê Konfederalîzmê Demokratîkî yê Ocalanî bêro astengkerdene o yeno tecrîdkerdene. Ozdemîre vat: ”Seba ke Ocalan bêro bêtesîrkerdene PKK gêrîya lîsteya terorî. La komelê Almanya sey hukmatî nêfikirîyeno û paştî dano têgêrayîşê kurdan.”
Ozdemîre ard ziwan ke seba ke vera tecrîdî erkanê xo nêkeno CPT sûcdar û vat: ”Bala bi mîlyonan merdiman serê Birêz Ocalanî de ya. Ma tim qala tecrîdî kenê la CPT bêveng o. Coka rayraşîyayîşê Kolnî yê 17ê sibate zaf girîng o. Tirkîya teng bîya. Mefteyê xelisîyayîşî zî Abdullah Ocalan o. Dewleta tirke na raştîye hol zanena, Almanya zî zanena. La Almanya bi polîtîkayanê xo kena ke kurdan krîmînalîze bikera. Almanya de têgêrayîşê kurdan yenê astengkerdene la komê sey DÎTÎB û Mîllî Goruş bi rehetî têgêrenê.
Almanya destekê çekan zî dana dewleta tirke. Almanya zî hol zanena ke nê çekî vera kurdan bi taybetî Rojawan de şuxilîyenê. Ma prosesê Efrînî de zî dî. Dewleta tirke bi panzeranê Almanya kewte Efrînî û qirkerdişêk kerd.”
Cansu Ozdemîre bale ante mudaxeleyê dewleta Almanya yê vera alanê YPG û YPJyî ser û vat: ”Rayîr û metodê teda yê cîyayî vera kurdan şuxilîyenê. Nika zî tedaya merdimanê rojawanijan yenê kerdene ke tîya de aktîf mebê û tewrê karanê sîyasîyan nêbê. Bi nê hawayî xîret yeno kerdene ke rêxistinî û têkoşînê kurdan qels bibê.”
