Bi daxwaza ji Rêberê Gelê Kurd Abdullah Ocalan re azadî û ji pirsgirêka kurd re çareseriya demokratîk, li bajarê Koln ê Almanyayê meşeke mezin hat organîzekirin.
Ji gelek welatan bi deh hezaran kes di saetên sibehê de hatin ba hev. Ji bo meş û mîtînga di salvegera 25’an a komploya navneteweyî ya 15’ê Sibata 1999’an a li dijî Rêberê Gelê Kurd Abdullah Ocalan pêk hatî de, hat organîzekirin weke cihê kombûnê DHB-Haûs hat diyarkirin.
Kurdistanî û dostên wan piştre bi poster û flamayên Rêberê Gelê Kurd Abdullah Ocalan li qada Siegburger Str Deutzer Wert a li rexa Çemê Ren ku mîtîng wê lê were lidarxistin, hatin ba hev.
Bi deh hezaran kes bi posterên mezin ên Rêberê Gelê Kurd Abdullah Ocalan dest bi meşê kirin. Girseya ku li ser pira Severinsbrucke’yê dest bi meşê kirin, piştî Çemê Ren derbas kirin flamayên bi nivîsa “Ji Ocalan re azadî”, “Free Ocalan” û “Freedom Ocalan” hildan û bê navber dirûşmeyên “Silav, Silav ji Îmraliyê re hezar silav” û “Bijî Serok Apo” berz kirin.
