Vervatoxanê Komîsyonê Huqûqî û Heqanê Merdiman ê DEM Partî Ozturk Turkdogan û Sevda Çelîk Ozbîngol derheqê asayîşê weçînayîşan de merkezê xo yê pêroyî de kombîyayîşê çapemenîye kerd.
Kombîyayîş de Turkdoganî pare kerd ke Vakurê Kurdîstanî de 54 hezar weçînitoxê zêdeyî asenê û vat: ”Zafê înan hêzê asayîşî yê. Ma 31 merkezan de na bêusûlîye ferq kerde û îtîraz kerd. La îtîrazê ma ameyî redkerdene. Teyna Agirî de yew adres de 1923 kesî ameyê qeydkerdene ke nê kesî zî endamê artêşa tirke yê. Ma gerreyê nê endamanê artêşe zî kerd. AKP nêwazeno ke weçînayîşanê herêmîyan de ma şaredarîyan bigêrê coka nê kayan dima de yo. La ma do verê bêusûlîyanê serê weçînayîşan de bêveng nêmanê.
Ancî balkêş o nê 31 merkezê ke tede weçînitoxî ameyê qeydkerdene nêzdîyê rayîranê bazirganîye yê. Manaya ney çita ya? Gelo weçînayîşan ra pey operasyonê leşkerîyî do bêrê kerdene? Xora îqtîdar sey her wextî têgêreno la qey muxalefet vera nê kerdişan vengê xo nêvejeno? Ma sîyasetê haştîye wazenê û kenê ke şarî pîya biciwîyê. Îqtîdar ancî peyê hesabanê şaşan de yo. Ma pêro herêman de erkdarê sindoqan dîyar kerdî û temsîlkarê xo yê heyetanê weçînayîşî dîyar kerdî. Ma prosesî do teqîb bikerê. Ma venga partîyanê bînan zî danê ke sey ma tedbîranê xo bigêrê.”
Sevda Çelîk Ozbîngol vat: ”Ma nê prosesê weçînayîşan de şahîdîyê xeylêk bêusûlîyan kenê. Nê bêusûlîyî vera îradeyê şarê ma darbe yê. Ma do tim hişyar bibê û bêusûlîyan teşhîr bikerê. Ma kenê ke weçînitoxî bi asayî şorê sindoqan ser. Weçînayîşanê gulane de îqtîdarî kerd ke bi operasyonanê qirkerdişê sîyasîyî verê ma bigêro. Nika zî heman çi beno. Bi rayîrê destbendkerdiş, tepiştiş û muhakemekerdişî îqtîdar xebatanê weçînayîşan keno. La ma do xo ver bidê û rejîmê qeyûman binê sindoqan bikerê. Ma do nê prosesî de rayîr nêdê bêhuqûqî û bêusûlîyan.” ANQARA
