Hemserekîya Konseya Rayberdişî ya KCKyî bi wesîleya serrgêra Qirkerdişê Gazî yê 12ê adara 1995 û Qirkerdişê Qamişloyî yê 12ê adara 2004î mesajêk pare kerd. KCKyî kesê ke qirkerdişan de şehîd bîyî yad kerdî û vat hêrişê Şeladizê ra pîya bi dewleta tirke PDK zî berpirsîyar o.
Eşerayîya Hemserekîya Konseya Rayberdişî ya KCKyî wina ya:.
”12ê adara 1995î de Taxa Gazî ya Îstanbulî de û 12ê adara 2004î de standê bajarî yê Qamişloyî de hetê hêzanê faşîstan ê dewlete ra qirikerdişî ameyî kerdene. Ma reyna nê qirkerdişan şermezar kenê û kesê ke wird qirkerdişan de şehîd bîyî şexsê înan de heme şehîdanê şoriş û demokrasîyî bi rêzdarî yad kenê.
Polîtîkayê qirkerdişî hetê îqtîdarê AKP-MHPyî ra yenê domnayene
Qirkerdişê Gazî sey dewamê qirkerdişanê dewleta tirke yê vera kurdan, elewîyan û sosyalîstan ame kerdene û sey qirkerdişanê bînan Qirkerdişê Gazî de zî şarî û têkoşîno hempar ê şaran ame hedefgirewtene. Têkoşînê Kurdîstanî û têkoşînê soyalîstanê Tirkîya serranê 1990an de resa pê. Seba ke têhetameyî nê wird têkoşînan zîhnîyet û polîtîkayê faşîstî yê Tirkîya fînayî tehluke, dewleta tirke verî hêzê xo yê paramîlîterî dima zî bi hêzanê xo yê polîs leşkeran eşkera hêrişê şarî kerd û qrikerdişo gird qewimîya. Na polîtîkaya dewlete ewro zî nêbedilîyaya, hetê îqtîdarê AKP-MHPyî ra yena domnayene. Îqtîdaro faşîst seba ke şarê kurdî û şarê tirkî, elewîyî, cinî û hêzê demokrasîyî merê têhet bi polîtîkayanê şerê taybetî hêriş û qirkerdişan rê dewam keno. Ganî sey verî ewro zî dahîna zaf yewîya hêzî bêro kerdene ke verê nê hêrişan bêro girewtene. Vera qirkerdişan cewabo tewr raşt oyo ke şarî îtîfaqê xo yê demokratîkî xurtêr bikerê û yewîya xo hêzdar bikerê.
Bi Qirkerdişê Qamişloyî ame waştene ke wa şerê zereyî bêro vetene
Qamişlo de badê maçê futbolî hêzanê faşîstan hêrişê kurdan kerd û qirkerdişêko wehşî qewimîya. Bi nê qirkerdişî ame waştene ke wa şerî biverdê pê, mabênê şaran de şer û pêkewtişî bivejîyê. Ewro gama ke merdim ewnîyeno rewşa Sûrîye ra dahîna hole fam keno ke bi Qirkerdişê Qamişloyî çi ame hedefkerdene. Şerê zereyî ke 2011î de ame destpêkerdene 2004 de bi Qirkerdişê Qamişloyî ame waştene ke wa vejîyo la têgêrayîş û şarê kurdî raşt nêzdî bîyî û verê nê girewt. Eke kurdî raşt nêzdî nêbîyênî şerê zereyî yê Sûrîye o wext dest pê kerdêne. Eke wo wext şer bivejîyayêne Sûrîye bi temamî ginayêne war. Çunke warginayîşê Rojawanî yeno manaya warginayîşê heme Sûrîye. La Sûrîye Qirkerdişê Qamişloyî ra netîceya ke ganî bigêro nêgirewt û sîyasetê xo yê nêzdibîyayîşê dewleta tirke û îdareyê Tayyîp Erdoganî domna. Na polîtîka bîye felaketê Sûrîya û rayîrê rewşa ewroyîne akerd. Dewleta tirke ya ke Sûrîya fîna mîyanê na rewşe neverdana Sûrîya na rewşe ra vejîyo. Dewleta tirke bi îşxalanê ke Rojawan û Sûrîye de kerdî, hêrişê ke tim bi destê DAÎŞ û çeteyanê xo yê bînan kena, pêro bi waştişê qirkerdişê vera Rojawanî yenê kerdene. La têkoşîno hempar ê şaranê Sûrîye do heme hêrişan betal bikero. Hetê bînî ra eke Sûrîye Îdareyê Xoserî yê Rojawanî reyde çareserîya demokratîke esas bîgêro û vera Tirkîya vejîyo eşkena verê nê polîtîkayanê qirkeran bîgêro. Sûrîye bi dîyalog û muzakereyî eşkena sere de meseleya kurdan heme problemanê xo çareser bikero. Vera qirkerdişan cewabo tewr raşt çarçewaya demokratîkbîyayîşî de çareserkerdişê problemanê Sûrîye, çarçewaya seyyewbînîye û yewîye de înşayê cuyeya hempare yo.
Berpisîyarê Qirkerdişê Şeladizê dewleta tirke û PDK yê
Dewleta tirke ya qirkere bi Qirkerdişê Şeladizê morê xo da binê yewna qirkerdişî ro. Nê hêrişî de dewijî Seîd Mubarek û Aras Ferec şehîd bîyî. Merkezê Qerargehê Merkezî û Komîteya Tekîlîyanê Teberî yê ma derheqê qirkerdişî de eşkerayîye kerdî. No qirkerdiş fîneno çiman ver ke dewleta tirke qey hêrişê Başûrê Kurdîstanî kena. Dewleta tirke çîyo ke wazena Vakurê Kurdîstanî de bikero, eynî çî wazenê Başûrê Kurdîstanî de zî bikero. Wazena Başûrê Kurdîstanî zî îşxal bikero û tîya kurdan qir bikero. PDK zî hemkarîya qirkerdişê kurdan yê dewleta tirke keno. Nê hêrişî pêro bi paştdayîş û hemkarîya PDKyî benê. Coka berpirsîyarê nê qirkerdişî pîya bi dewleta tirke PDK yo.”
