Mesajê Karayilanî wina yo:
”Nameyê îdareyê têgêrayîşê ma ez Newroza Rayber Apoyî fîraz kena. Ancî ma Newroza pêro şarê ma, dadîyanê şehîdan, embazan, sempatîzanan û xebatkaranê xo fîraz kenê. Ez na roja fîraze de şexsê Kawayê Modernî Mazlûm Doganî de pêro şehîdanê ma bi rêz û minetî yad kena.
Newroze seba têgêrayîş û têkoşînê ma wayîra cayêkê girîngî ya. 51 serrî verî rojêka Newroze de Rayber Apo kewt rayîr û a roje ra heta na roje bi têkoşînî ruhê Newroze xurtêr bi. Newroze de Mazlûm Doganî vera zulmî Zîndanê Amedî de çalakîyêka pîle kerde. Dima zî Zekîye Alkan, Rahşane Demîrel, Ronahî Bêrîvanan bi bedenê xo adirê Newroze gir kerd. Sey Cizîre û Nisêbînî şarê ma Newroze şehîdî dayî û ruhê Newroze berz kerd. Newroze bi nê hawayî bîye wayîra ruhê neteweyîyî.
10ê teşrîna verêne ya 2023yî de dostanê ma seba azadîya Rayber Apoyî û çareserîya meseleya kurdan hemleyêke îlan kerdbî. Ma pê bawer ê ke Newroze reyde na hemle do hîna xurt biba. Ma tepişteyanê grevê vêşanîye, dadîyanê Nobetanê Edaletî, Nobeta Azadîye ya Strasbourgî û nobeta Azadîye ya Mexmûrî selam kenê û nînan fîraz kenê.
Embazê ercîyayeyî;
Newroza 2024î Newrozêka normale nîya. Ma prosesêkê tarîxîyî de na Newroze pêşwazî kenê. Coka na Newroze sey ‘Newroza Azadîya Rayber Apoyî’ ameye îlankerdene. Şarê ma bi sloganê ‘Rayber Apoyî rê azadîye’ ho Newroze pêşwzazî keno. Şarê ma azadîya Rayberîye sey azadîya xo vîneno. Ganî komplogerê namerdî nê vengî bieşnawê. Ma tîya ra venga pêro hêzanê komplogeran danê ke hinî bes o! Paştî medê terorê dewleta tirke! Azadîya Rayber Apoyî û Kurdîstanî heqê meşrû yê. Verê na raştîye de erkanê xo bîyarê ca.
Ancî girîngîya na Newroze ya diyîne zî na ya ke 10 rojan ra dima Vakurê Kurdîstanî de weçînayîşî est ê. Îqtîdarê AKP-MHPyî bi rejîmê qeyûman îradeyê şarê ma binpay keno. Wa şarê ma, dostê ma, demokrat û şorişgêrî bi ruhê Newroze şorê sindoqan ser. Ma bimojnê ke wayîrê îradeyê xo do vejîyê û qeyûman nêwazenê.
Aya hîrêyîne na ya ke ma dewrêkê girîngî derbaz kenê. Dewleta tirke ya Ergenekonî û îqtîdarê AKP-MHPyî vera ma planê hêrişanê neweyan kenê. Ma zî zanenê ke ê seba nê planî xebatanê dîplomasî kenê. Hinî ê zî zanenê ke bi sereyê xo pê gerîlayan nêeşkenê. Coka gêrenê ke bi destekê hêzanê bînan hêrişê gerîlayan bikerê. Dewleta tirke wazena ke destkewteyanê şarê ma çin bikera, Mîsak-i Mîllî îşxal bikera û erebanê Iraq û Sûrîye kontrol bikera.
Dewleta tirke ya faşîste seba Kurdîstanî vana ‘terorîstan.’ La a bi xo nê cayan de terorî kena. Başûr, Şingal û Rojawan de dewleta tirke sey eşkîyayan têgêrena. Ma do qetî ney rê destûr nêdê. Wa şarê ma û dostê ma bizanê ke nê prosesê tarîxîyî de ma amade yê ke xo ver bidê. Ma pê xo bawer ê. Çunke ma zanenê ke şarê ma hetê ma de yo. Şarê ma hêzo tewr pîl o. Ma çewî ra nêtersenê. Ma do cewabê hewceyî bidê hêrişan.
Nika şarê ma û dewaya azadîye ya Kurdîstanî hewceyê yewîya neteweyî yê. Ganî nê prosesî de şarê kurdî bibo wayîrê stratejîyêka neteweyîye. Coka ma sey PKKyî veng danê ke wa yewîya ma ya neteweyîye bêra caardene. Ganî welatperwerî stratejîya xo ya neteweyîye virazê. Wa her kes bizano ke sey têgêrayîşî seba ke şarê ma bi azadî biciwîyo destê ma ra çi bêro ma do bikerê.
Na babete de tecrubeyê ma yê stratejî û taktîkan est ê. Nê esasî ser o ma do xo ver bidê. Ma şerî nêwazenê. La êyê ke hêrişê ma kenê do cewabê xo bigêrê. Dewleta tirke welatê ma de terorî kena, Rayberîya ma tecrîd kena û sîyasetê qirkerdişî ana ca. Nê pêro kerdişî barbarî yê. Wa çew destek medo nê kerdişan. Ma venga hêzanê NATOyî û paştgiranê dewleta tirke danê ke rayraşîyayîşê ma raşt û edîl o; waştişê ma meşrû û xozayî yê. Ma do seba nînan her çi bikerê û do ser bikewê. Ma her wextî ra zêdeyêr bi serkewtişî bawer ê. Ma do roşnîya xeta Rayber Apoyî de, rêçê şehîdanê xo yê qehremanan de ser bikewê! Nê esasî se ro ez Roşanê Newroze fîraz kena. Ez rayraşîyayîşê azadkerdişê Rayber Apoyî û Kurdîstanî de her kesî rê serkewtiş wazena.
BIJÎ BIJÎ NEWROZ!
BIJÎ YEKÎTIYA NETEWE Û TÊKOŞÎNA GELÊ ME
BIJÎ SEROK APO”
