Qezaya Rezanî ya Amedî de Parka Newroze de bi şîarê ‘Wurze We, Wext wextê azadî û serkewtişî yo’ Newroze yena fîrazkerdene.
Meydan de qasê mîlyonêk kesan adirê Newroze gir kerd.
Şayîye de hêverî aktîvîsta Têgêrayîşê Cinîyan ê Azadan (TJA) Aynure Sarica qisey kerd û vat ke na Newroze do biba wesîleya azadîya Rayberê Şarê Kurdî Abdullah Ocalanî.
Hemserekê Kongreya Komelê Demokratîkî (KCD) Berdan Ozturkî vat: ”Seba azadîya Kurdîstanî û kurdan yewîya neteweyî şert a. Seba azadîya kurdan azadîya Ocalanî şert a û çareeserîya meseleya kurdan şert a.”
Şayîye de mesajê tepişteyanê grevê vêşanîye ameyî wendene.
Dima hunermende Xezale Mistefa vejîyaye sehne ser û endamanê DEM-GENÇî rayraşîyayîş kerd.
Namzedê Şaredarîya Amedî yê DEM Partî Serra Bucak û Dogan Hatun bi çepikan vejîyayî sehne ser. Serra Bucak îfade kerd ke ê do qeyûman ra Amedî apey bigêrê û vat: ”Na Newroze wa biba wesîleya yewîya kurdan.”
Dogan Hatunî vat: ”Wa her kes bizano ke kurdî azadîye wazenê. Ma do wayîrê sindoqan vejîyê û nêverdê ke îradeyê ma bêro destvistene.”
Hemsereka DBPyî Çîgdeme Kiliçgun Uçar bi kirdkî qisey kerd û ard ziwan ke Newroze ‘wijdan, xoverdayîş û azadîye’ yo.
Dima hunermend Faraj Alipour vejîya sehne ser û girseyî bi deyîranê ey govende girewte.
Hema zî xeylêk merdimî kenê ke debikewê meydanê Newroze. Meydan de vera sloganê ”Bijî Serok Apo” yeno vatene.
