Uçarî vist vîrî ke weçînitoxê ke şaristanê xo yê qeydkerdeyî de nîyê eşkenê heta 27ê adare înan rê muracat bikerê û vat: ”Weçînitoxî eşkenê bêrê bînayanê ma yan zî înternetî ra qeydê xo bikerê ke ma nînan berê şaristananê înan. Formê ma yê qeydî înternetî ser de zî est o. Ma wazenê derheqê nê qeydan de agahîyan bidê rayaumûmîye û medya zî. Çunke nê agahîyî seke done yê. AKP-MHPyî weçînitoxê sexteyî Kurdîstan de pêser kerdî. Şarê ma weçînayîşanê pêroyîyan ra zafêr giranîye dano weçînayîşanê herêmîyan. Çunke şar wazeno herêmanê xo de xo bi xo îdare bikero.
Nê weçînayîşan de zî ewnîyayîşê dewlete û îqtîdarî yê bi Kurdîstanî eynî yo. Coka ma xebatanê xo de hîna zaf giranîye danê Kurdîstanî. Pêroyê Kurdîstanî seba ma zaf krîtîk o. Coka ma 110 cayanê Kurdîstanî rê bi destekê sponsoranê xo do weçînitoxan berê. Emser ma Riha ser o biîdîa yê. Embazê ke teberê şaristanê xo de yê wa xo biresnê ma. Ma do înan berê sindoqan ser.”
Uçarî peynîya qiseykerdişê xo de wina vat: ”Wa çew mevajo ke ‘bi rayêke çîyêk nêvurîyeno.’ Seba ke ma şaredarîyanê xo destê qeyûman ra bixelisnê, tecrîdê vera Birêz Abdullah Ocalanî bişiknê û xizmetî bivînê ganî ma raya xo bidê. Embazê ma yê kedkarî, wendekarî û xebatkarî wa verê xo bidê Kurdîstanî, raya xo bidê. Ma pêro îmkananê xo seba ney şarê xo rê seferber kenê.”
