Hemsereka DEM Partî ya Amedî Pinar Sakik Tekîne şayî û mesajê Newroze ANFyî rê ercnayî. Tekîn îfade kerd ke na Newroze de ruhê serranê 90an est bîyo û vat: ”Tirkîya, Kurdîstan û Ewropa de verê her keyeyê kurdan de adirê Newroze ame tavistene. Amed de zî rixmê varayîş û Remezanî zî qerebalixêko pîl est bi. Na Newroze vera polîtîkayanê asîmîlasyon, qeyuman û îqtîdarî cewabêk bîye. Newroze de mesajê girîngî dîyayî û azadîya Birêz Ocalanî û çareserîya meseleya kurdan ameyî waştene.
Şarê kurdî Newroze de vat ‘azadîya Rayberîye, azadîya ma ya.’ Ma Newroze de fam kerd ke tecrîd seba pêro şaran mesele ya û seba haştîye ganî tecrîd bêro wedaritene. Meydananê Newroze ra na netîce vejîyaye ke qeyûmî erzîyayî çopê tarîxî.”
Tekîne pare kerd ke hêriş û tedayî pê şarî nêeşkayê û vat: ”Newroze de ame waştene ke wa şarê kurdî yew bibo. Na Newroze de qalê Leyla Zana zaf ame kerdene. Leyla Zana ancî mîyanê şarî de tesîrêko pîl viraşt û ruhê 90an gandar kerd. Ma bi nê hîs, tesîr û tewirê şarî şinê weçînayîşanê 31ê adare. Şarê kurdî ancî sindoqan de cewabêkê xurtî bidê ferasetê dizdî. Her raye do qeyûman rê bibê lapatêk.”
