Hîzbullahî serranê 90an de Hafiz Sadik Turhalli qetil kerdbi. Hafiz Sadik Turhalli qezaya Dara Hêni ya Çewlîgî ra bi. Birayê ey Abdurrahîm Turhalliyî pare kerd ke de înan barê Amedî kerdo û tîya de têkoşînê azadîye şinasnayo.
Abdurrahman Turhalli
Abdurrahman Turhalliyî vat: ”Keyeyê ma ra Dr. Azîz Turhalliyî hêverî mîyanê têkoşînî de cagirewt. O 1989 de tewrê gerîlayan bi û 9ê kanûna 1990î de şehîd bi. O çax destekê seba têkoşînî vera zêdîyayêne. 5ê temmuza 1991î de Vedat Aydin amebi qetilkerdene. Serrêke dima kekê mi amebi destbendkerdene û 28ê tebaxa 1992yî de amebi qetilkerdene. Qetilkerdişê Vedat Aydinî ra dima ez û birayê mi Emîn tepişîyabî. Polîsan qereqol de ma rê gef wendbi ke ma teslîmê Hîzbullahî bikerê. Yanî qetilkerdişê kekê mi ra verî bi Hîzbullahî dewlete ma tehdît kerdêne. 40 rojan ra dima ma vera dîyayî. O çax cadeyê nêweşxaneyî de bufeya ma est bîye. Polîsan û Hîzbullahî tim ma teqîb kerdêne.
Hafiz Siddik Turhalli
28ê tebaxe de ez û lajê kekê mi Hafiz Ahmet ma bufe ra şîyêne keye. Cîrananê ma xebera qetilkerdişê kekê mi daye. Ma cade şîyî nêweşxaneyî. Ma cenazaya xo waşte la polîsan nêdaye û heqaretê ma kerd. Polîsan lajê Mela Sidikî Hafiz Ahmetî rê zaf îşkence kerd. Hema şînê ma dewam kerdêne la narey Hîzbullahî birazayê mi Saît Menteş kerd hedef. Yanî dewlete vatêne ‘Ma şima teslîmê Hîzbullahî kerd.’
1992 de tedayan ra ma agêrayî dewa xo ya Çewlîgî. Şarî tersê dewlete ra ma de têkilîye nêviraştêne. 1994 de zî ma surgunê Îstanbulî bîyî. Kekê mi hetê têtikkeşanê Hîzbullahî Fuat Balci, Abdulkerîm Kaya û M. Faysal Bozkuşî ra ame qetilkerdene. Hîzbullah projeyêkê dewlete bi ke pê ci kurdî bi destê kurdan qetil kerdêne.
90an de Hîzbullahî merdimî qetil kerdêne. Nika zî qaşo sîyaset kenê ke wa çew verê înan nêvejîyo. Huda-Par bi şuxilnayîşê dînî kurdan xapîneno. Dewlete peyê Huda Parî de ya. Şarê ma wa prîm nêdo nînan.”
Edîp Kiliç
Murat Kiliço (34) ke Hîzbullahî keyeyê ci ra panc kesî qetil kerdbî nika Heyetê Rayberdişê Merkezî yê DBPyî de sîyaset keno.
Murat Kiliçî vat: ”1ê teşrîna verêne ya 1992yî de taxa Beşevlerî de verê keyeyê ma de babîyê mi Edîp Kiliç ame qetilkerdene. 20 rojan ra dima Hîzbullahî narey keyeyê ma da guleyan ver. Tîya de pîrikê ni Şukru Kiliço ke seba tazîya amebi û mêrdeyê amika mi Anter Yalçin ameyî qetilkerdene. Apê mi Îrfan Kiliç birîndar bi. Êlula 1993yî de zî apê mi Habîp Kiliç û Hîkmet Kiliç Êlih de raştê hêrişî ameyî û tîya de apê mi Habîp kişîya. O çax Wekîlê DEPî Mehmet Sîncar seba cigêrayîşê nê cînayetan ame la o zî ame qetilkerdene. 9ê gulana 1993yî de lajê xala mi Medenî Goktepe hetê Hîzbullahî ra ame qetilkerdene.
Habip Kiliç
Hîzbullahî tim ma tehdît kerdêne. Coka ma neçare mendî ke koç bikerê. Dadîya mi vatêne ke qetilkerdişê ci ra verê cû zî Hîzbullahî babîyê mi tehdît kerdêne û remnayêne. Hîzbullah hacetê şerî yê dewlete yo ke vera kurdan şuxilîyeno. Hîzbullahî yan zî Huda Parî qetî menfaetê kurdan xo rê derd nêkerdî.
Huda Par dişmenê cinîyan o û nêwazeno cinîyî azad bibê. La têgêrayîşê azadîye yê kurdan nê 40 serran de tim heq û azadîyê cinîyan pawitî. Şarê ma do qetî serranê 90an xo vîr a nêkero. Ganî şarê ma bi îradeyê xo cewabê Huda Parî bido.”
Îkram Gornu
Îdarekaranê MEBYA-DERî ra Îkram Gornuyo (44) ke babîyê ci Ekrem Gornu 1992 de Êlih de û pîrikê ci Îzedîn Gornu Adana de ameybî qetilkerdene, vat: ”Apê mi Ahmed 1978 de tewrê gerîlayan bi û 1998 de pa 12 embazanê xo Êlih de şehîd bi. Pîrikê mi ronayoxanê HEPî ra bi coka keyeyê ma şinasîyayêne. Babîyê mi 24ê tebaxa 1992yî de verê dikana xo de hetê kontrayan ra ame qetilkerdene. O çax seba babîyê mi merasîmêko girseyî amebi kerdene. La polîsan pîrikê mi tehdît kerdbi ke wa çew sloganî nêvajo.
Qetilkerdişê babîyê mi ra aşmêke dima apê mi Aydin raştê hêrişê kontrayan ame la birîndar bi. Nêweşxane de kontrayan doktorî tehdît kerdbî. Coka ma apê xo cade uca ra vet. Tehdîtan ra dima ma koçê Adana kerd. Wexto ke pîrikê mi amebi qetilkerdene ez 15 serre bîya. O çax debara keyeyî zî milê mi de mende. Serra 2000î de ma agêrayî Êlihî.
Ekrem Gurnu, Izzettin Gornu û Aydin Gornu
Ganî Hîzbullah û Huda Par bêrê muhakemekerdene. Nînan kurdê têkoşerî qetil kerdî. Çew çekuya Kurdîstanî vajo cade yeno tepiştene. La Huda Par bi rehetî vano ke ê ‘Kurdîstanê Azadî’ wazenê. Çew zî nînan nêtepişeno. Çunke seke Wezîrê verênî Suleyman Soyluyî vatbi Huda Par projeyê dewlete yo. Huda Par seba ke têkoşînê kurdan bêro tasfîyekerdene newe ra kewt dewre.”
