Konseya Hemserekîya Pêroyî ya KCKyî bi wesîleya rojbîyayîşê 75inî yê Rayberê Şarê Kurdî Abdullah Ocalanî eşkerayîyêke daye. Eşkerayîye wina ya:
”4ê nîsane de Rayber Apo keweno 75 serra xo. Ma rojbîyayîşê ey sere de cinî û ciwanan pêro şarê kurdî û dostanê ma rê fîraz kenê. Ma şehîdanê 4ê Nîsane Mahsum Karaoglan û Mustafa Dagî zî bi rêz û minetî yad kenê.
Şarê ma 4ê Nîsane bi coş û kêfweşî fîraz keno. Çunke 4ê Nîsane seba kurdan û cinîyan wayîrê manayanê xorinan o. 4ê Nîsane rojanê tarîyan ra dima resayîşê rojanê rindan o, mijdanîya newe ra bîyayîşê kurdan a û mijdanîya cuya azade ya.
Kurdî 4ê Nîsane sey rojbîyayîşê xo qebul kenê û fîraz kenê. Çunke seba kurdan 4ê Nîsane ra verî seke tarîtîya mezelî est bîya. Bi rojbîyayîşê Rayber Apoyî seba kurdan wextêko newe dîya destpêkerdene.Rayber Apoyî çimê kurdan akerdî. Şarê ma zî bi bedelanê pîlan têkoşînêko xurt kerd. Çunke şarê ma fam kerd ke xeta Rayber Apoyî rayîrê felate yo.
Tezê Azadîya Cinîyan ê Rayber Apoyî ewro verê cinîyan ê kurdan roşnî kenê. Bi nê tezan cinîyê kurdî têkoşîn kenê û dinya de benê sebebê qewimîyayîşanê girîngan. Ferasetê cinîyan ê kurdan pêro cinîyan keno wayîrê ferasetî. Qet yew hêzê dewlete û îqtîdarî nêeşkeno verê nê feraset, rêxistinî û têkoşînê cinîyan bigêro. Na raştîya têkoşînê cinîyanê Vakurî yê vera dewleya tirke de, têkoşînê cinîyanê Rojawanî yê vera DAÎŞî de û têkoşînê cinîyanê Rojhelatî yê vera rejîmê Îranî de aseno. Coka xoverdayîşê cinîyan ê kurdan sayê hêzê Rayber Apoyî ra lapatêkê tewr bitesîrî dano sîstemê kapîtalîstî yê tacîzker-tecawuzkerî.
Pawitişê Rayber Apoyî vera kapîtalîzmî tewirgirewtiş o. Verê nîjadperestîye, neteweperestîye, sîstemê serdestîya camêrdan, dişmenîya ekolojî û komelî de vindertiş o. Pawitişê Rayber Apoyî wayîrvejîyayîşê erjanê azadîye, têdûştî û demokrasîyî yo. Pawitişê Rayber Apoyî wayîrvejîyayîşê tewirê sosyalîst û antîkapîtalîstî yo û bîyayîşê demokratîk, ekolojîk û azadîgirîya cinîyan o.
Şarê ma Newroza emserîne sey Newroza Rayberîye fîraz kerde. Şarê ma bi qerardarî meydananê Newroze de azadîya Rayber Apoyî waşte. Şarê ma no tewirê xo weçînayîşanê peyênan de zî vurna îradeyêko sîyasî û rejîmê îqtîdarî yo faşîst şoq kerd.
Şarê ma do nê tewirê xo yê meydananê Newroze û weçînayîşan temamîya 2024î de, bi rêxistinîyêka pîlêre biresnê asta çalakîyanê tewr xurtan. Ma zî sey têgêrayîşî seba ke tecrîdê vera Rayber Apoyî bêro wedaritene û azadîya ey bêra caardene xebatanê xo rê dewma bikerê. Ma venga şarê ma yê welatperwerî, cinî û ciwanan, dostanê ma danê ke seba ke tecrîd bêro wedaritene û azadîya Rayber Apoyî bêra caardene têkoşînî pîlêr bikerê û çalakîyanê bitesîran bikerê, rêxistinîya xo aver berê, û 4ê Nîsane de her ca de leyan ronê.”
