Parlamentoyê Ewropa de derheqê rewşa tepişteyanê sîyasîyan de ê ke raştê tecrîd, îşkence û muameleyê xirabî yenê, konferansêk ame kerdene. Konferanso ke endamê Parlamentoyê Ewropa Massimiliano Smeriglio mêmandarîya ci kerd hetê Yewîya Avûkatan ê Ewropa yê Semedê Heqanê Merdiman ê Dinya (ELDH), Avûkatê Demokratî yê Ewropayijî (AED) û Komeleya Demokrasî û Huqûqê Mîyanneteweyî (MAF-DAD) ra ame organîzekerdene.
Netîcenameyê konferansî ame eşkerakerdene. Netîcename wina yo:
”Sere de zîndananê Tirkîya de zîndananê Ewropa de serebûtê xirab û îşkenceyî zêdîyenê. Tecrîd vurîyayo rejîmêk. Konferansê ma pare kerd ke îşkence û kerdişê xirabî meseleyê bingeyînî yê.
Tirkîya nê welatan ra yew a ke hûmara tepişteyanê sîyasîyan tede zaf a. Rîyê rejîmê AKP-MHPyî ra huqûq vurîyayo bîyo hacetêkê tedaya sîyasî. Modelê neweyî yê zîndanan, surgun, vêşnayîşê înfazan, qedexeyî, astengkerdişê xizmetanê weşîye, cigêrayîşo rût ûsn zîndananê Tirkîya ra tim kewenê rojdem.
Tecrîdê Îmraliyî yo ke vera Birêz Ocalanî yeno kerdene cayêkê bînî de nimûneya ci çin a. Têkoşînê vera tecrîdî ganî bêro berzkerdene.
Konferansê ma bire daye ke ganî vera tecrîdî têkoşînêko sîyasî û huqûqî yo hempar bêro kerdene.
Ganî Yewîya Ewropa (YE) vera tecrîdî tewirêkê xurtî bimojna û gamanê xurtan bierza.
Ganî CPT babeta Zîndanê Îmraliyî de erkanê xo bîyaro ca.
Seba nîqaşkerdişê kerdişanê xiraban û îşkenceyanê zîndanan konferansêko hîra ganî bêro kerdene.
Waştişnameyo ke 1330 avûkatan çeleyê 2024î de vera tecrîdê Îmraliyî îmza kerdo û dayo Wezîrîya Edaletî ya Tirkîya seba ke paştî bidîyo ney ganî Ewropa de kampanyaya îmzayan bêra kerdene.”
