Hemserekê Konseya Rayberdişî ya KCKyî Cemîl Bayikî ANFyî rê meqaleyêke nuşte.
Bayikî meqaleya xo de bale ante binkewtişê weçînayîşan ê AKP-MHPyî ser û vat: ”Binketişê îqtîdarî de kurdan rolêko dîyarker kay kerd. Xoverdayîşê Îmraliyî, Hemleya Azadîye ya vera tecrîdê serê Rayber Apoyî, şerê gerîlayan, şayîyê Newroze bîyî sebebê serkewtişê weçînayîşan ê şarê kurdî.”
Bayikî hişyar kerd ke hêrişê dewleta tirke prosesê verê ma de do bizêdîyê û vat: ”Dewleta tirke Iraq de peymanêka asayîşî kerde. Dewleta tirke ya qirkere bi na peymane wazena Iraqî tewrê şerê vera PKKyî bikera. PKKyî qetî zerar nêda menfaetanê dewleta Iraqî. La wina aseno ke dewleta tirke seba şerê vera PKKyî Iraq de pêvînayîşan kena. Eke bira ke Konseya Asayîşê Neteweyî ya Iraqî girewta raşt a na bire teyna PKKyî rê ney menfaetanê Iraqî rê zî do zerar bida.”
Bayikî hemkarîya PDKyî ya bi dewleta tirke viste vîrî û vat: ”Hinî pêro şarê kurdî zaneno ke PDKyo ke hemkarê dewleta tirke yo rayîrêkê xelatî de yo. PDK wa cade nê rayîrî ra abigêro û dûştê PKKyî de canêgêro.
PDK dewleta tirke rê eqil dano ke a senî Iraqî tewrê şerî bikera. PDKyî dewleta tirke rê vato ke eke YNK tewrê şerê vera PKKyî nêbo şerî ra netîce nêvejîyena. PDK dewleta tirke teşwîq keno ke a tedaya YNKyî bikera. Xora PDK bi her hawayî dewleta tirke rê ardim keno. PDK waranê gerîlayan de seba dewleta tirke baregehan virazeno, rayîran virazeno, rayîrê gerîlayan gêno û unîformayanê pêşmergeyan dano leşkeranê tirkan ro.
Keyeyê Barzanîyan mîyanê zengînîye de yo la şarê Başûrî mîyanê xizanîye de yo. PDK nika vera Mehkemeya Federale ya Iraqî de zî şer keno ke hûmara kursîyan a verêne apey bigêro. Serranê peyênan de vera PDKyî nêrazîbîyayîşê şarê ma zêdîya. Başûr de meaşê karmendan nêdîyeno. Keyeyê Barzanîyan binê nameyê Pêşmergeyanê Roje de artêşêke awan kerde ke beşdarê ci rojawanij ê. Meaşê karmendan şinê nê hêzan.
PKKyî heta nika qetî vera partîyêka kurdan paştî nêdaye dewletêke û dişmenîya qet yew partîya kurdan zî nêkerda. Sere de Rayber Apo pêro endamê ma madîyat û hişmendîya îqtîdarbîyayîşî ra dûrî de ciwîyenê. La PDK seba menfaetanê xo dişmenîya PKKyî keno.
Gerîlayê azadîye bi derbanê xo yê giranan bîyî sereberzîyê şarê ma. Gerîlayan bi operasyonanê xo yê şorişgêran xeylêk mewzî û baregehê artêşa îşxalkere îmha kerdî. Bi taybetî seba ke gerîlayî îmkanê îmhakerdişê droneyanê çekdaran visto destî şarê ma moralêko pîl girewt. Înîsîyartîfê şerî hinî destê gerîlayan de yo.
Şayîyanê Newroze emser morê xo da binê prosesî ro. Şarê ma nê şayîyan de mojna ke o pawitişê azadî û estbîyayîşê xo de qerardar o. Şarê ma û dostanê ma nê şayîyan de seba azadîya Rayber Apoyî zî mesajê girîngî dayî. Bêguman nê qewimîyayîşî bawerîya serkewtiş û xoverdayîşê şarê ma bihêz kerde.
Dewleta tirke dewletêka îşxalker a. Ewro zî dewleta tirke kena ke Başûr û Rojawanê Kurdîstanî îşxal bikera. Dewleta Iraqî naye hol zanena. Coka Iraq ganî vera hêrişanê dewleta tirke bêveng nêba. Dewleta tirke kena ke Iraqî tewrê şerê xo yê vera PKKyî bikera. Ganî Iraq tewrê nê kayê gemarinî nêbo.
PKKyî Iraq de tim têkilîyê dostanîye awan kerdî. Dewleta tirke Iraq de peymanêka asayîşî kerde. Dewleta tirke ya qirkere bi na peymane wazena Iraqî tewrê şerê vera PKKyî bikera. PKKyî qetî zerar nêda menfaetanê dewleta Iraqî. La wina aseno ke dewleta tirke seba şerê vera PKKyî Iraq de pêvînayîşan kena. Eke bira ke Konseya Asayîşê Neteweyî ya Iraqî girewta raşt a na bire teyna PKKyî rê ney menfaetanê Iraqî rê zî do zerar bida.
Ma wina hêvî kenê ke Iraq do nêbo şirîkê dewleta tirke.
Ma venga sîyasetmedaran, şarê ma, akademîsyenan, roşnvîran, cinî û ciwanan danê ke sere de vera PDKyî vera pêro hemkaranê dişmenî tewirê xo bimojnê.”
