Endamê şerê taybet, çawişê pispor Zekeriya Çelîk di 12’ê nîsanê de li Şirnexê li dijî 2 jinan êrîşa zayendî kiribû û ji hêla gelê Şirnexê ve bi xweparastinê bêbandorkirin. Leşkerê tecawizkar piştî ji peywîrê hatibû dûrxistin duh bi sûcdariya “êrîşa zayendî” ji aliyê dadgehê ve hat girtin. Îfadeyên Çelîk ê bi SEGBÎS’ê dan Dadgeha Cezayê ya Sûlh a Şirnexê hatin bidestxistin.
Tecawizkar Çelîk îdia kir ku ji bo “alîkariya” jinên ku tacîz kirine bike ketiye avahiyê û di bûyerê de “mexdûr” e. Çelîk îdia kir ku roja bûyerê bi hevjîna xwe re nîqaş kiriye û ji bo ku hewa bistîne çûye derve û dema ji tûgayê ber bi sûkê ve dimeşiya, jinek ketiye avahiyê û dûre ji avahiyê dengê “bibin alîkar” bihîstiye.
Di berdewamiya axaftina xwe de Çelîk îdia kir ku bi bihîstina deng re re ketiye avahiyê, piştre jinan dest bi qêrînê kirine û wî jî gotiye “Ez leşker im aram bin, ez ji bo alîkariyê hatime.” Çelîk da zanîn ku piştî kesê ketiye avahiyê bi kurdî hin tişt gotin û piştre bi gavên lez ber bi kolana ku midûriyeta polîsan lê ye dest bi bazdanê kiriye û got ku ji aliyê kesên ku ew dorpêç kirine ve hatiye derbkirin.
Çelîk îdia kir ku destdirêjî jinan nekiriye û bi gotinên: “Ez 15 sal in xizmeta cemaweriyê dikim. Ez 1.90 metre dirêj im û 90 kîlo me. Heke bixwazim zirarê bidim yekî bi qasî ku birîndar bikim dikarim zirarê bidimê. Di wê hawirdorê de di wê adrenalînê de dest neda tu kesî û kes dehf neda” xwe parast.
Çelîk li xwe mikur hat ku roja bûyerê serxweş bû û ev tişt gotin: “Ez tiştên pê têm sûcdarkirin teqez qebûl nakim. Ez di pîşeya xwe de kesekî rêzdar im û têm hezkirin. Ji bo ez di ezmûna bilindbûna di peywîrê de serkeftî bûm, piştî hefteyekê ez da bikevim vê ezmûnê. Ne pêkan e ku tişteke wiha bikim. Malbateke min jî heye. Ji ber vê bûyerê ez di rayagiştî de hatim lînckirin.”
