Desteya Piştevaniyê ya Stêrk û Medya Haber TV têkildarî serdegirtina polîsan de daxuyanî dan. Di daxuyaniye de hat diyarkirin ku avahiyên televîzyon niha ji aliyê bi sedan polîsan ve hatine dagirkirin û wiha hat gotin: “Em bang li gelê xwe dikin ku ji bo pêşî li vê bêhiqûqiyê û serdegirtina neqanûnî bigire, berê xwe bide cihê televîzyonan.”
Daxuyanî bi vî rengî ye:
“Dema dawî konsepta ku dewleta Tirk ji bo qirkirina kurdan amade kiriye, hewl tê dayin ku bi cih bê anîn. Serdana Tirkiyeyê ya li DYA, Iraq û Îranê, her wiha peymanên bi PDK’ê re mohr kir, li gel van hemûyan serdana Serokkomarê tirk Erdogan a li Iraq û Barzaniyan, nîşaneyên dawî yên ji bo bicihanîna vê konsepta qirkirinê ne. Êrîşa dagirkeriyê ya li ser Metînayê jî asta leşkerî ya vê qirkirinê ye.
Aşkera ye ku ev konsept konsepteke êrîşê ya navneteweyî ye. Serdegirtina studyoyên Medya Haber û Stêrk TV ên li Belçîkayê ku şeva 23’yê nîsanê saet derdora 02:00 pêk hat, nîşaneya şênber a vê yekê ye. Televîzyonên me niha ji aliyê bi sedan polîsî ve hatine dagirkirin. Bi vê serdegirtinê tê xwestin, dengê gelê kurd bê birîn. Nabe ku em li hemberî vê serdegirtinê bêdeng bimînin.
Em bang li gelê xwe dikin ku ji bo pêşî li vê bêhiqûqiyê û serdegirtina neqanûnî bigire, berê xwe bide cihê televîzyonan.”
