Komîteya Vergirewtişê Îşkenceyî (CPT) ya Konseya Ewropa Bruksel de Parlamentoyê Ewropa de raporê xo yo serrane eşkera kerd.
Kombîyayîşê çapemenîye de Sekreterê CPTyî Hugh Chetwyndî rê Stêrk TVyî derheqê tecrîdê Îmraliyî de persêk da la sekreterî bi zelalî cewab nêda persî.
Chetwyndî vat: ”Her zîyaretê xo yê Tirkîya de ma derheqê babeta Îmraliyî de selahîyetdaranê tirkan de dîyalogan virazenê. La nê dîyalogî taybet (nimite) yê. Komîte babeta tecrîdê Îmraliyî ser de vindena. Ma waştêne ke raporê xo yê zîyaretê Îmraliyî yê 2022yî eşkera bikerê la seba ney ganî dewleta tirke bire bida. Hewteyê vîyarteyî de komîteya ma avûkatanê Birêz Abdullah Ocalanî de qisey kerd. Ma babeta tecrîdê Îmraliyî de hesas ê. Ma do wextêkê munasîbî de uca zîyaret bikerê.”
CPTyî raporê zîyaretî yê 2022yî hema zî eşkera nêkerd û 2024 de tewr nêşi Îmraliyî.
Rayberê Şarê Kurdî Abdullah Ocalanî ra hîrê serrî yo xeberêke nêna girewtene. Muracatê pêvînayîşan ê keye û avûkatanê Ocalanî bêcewab yenê verdayene.
Seba wedarîyayîşê tecrîdî û azadîya Rayberê Şarê Kurdî têkoşînêko bêmabên yeno kerdene. Tepişteyî seba azadîya Ocalanî û çareserîya meseleya kurdan 27ê teşrîna peyêne ya 2023yî ra nata grevê vêşanîye de yê. Merdim û keyeyê tepişteyan zî Nobeda Edaletî kenê.
