Fermandaranê Qerargehê Merkezî yê YJA-Starî ra Şerda Mazlûm Gabar Medya Haber TV de rojdem ercna.
Qiseykerdişê Şerda Mazlûm Gabar ra tay noqtayê girîngî wina yê:
”Kurdîstan de şerêko giran qewimîyeno. Heta nika şer de xoverdayîşêko xurt hetê gerîlayan ra ame mojnayene. 2015 de dewleta tirke ‘Planê Çokdayîşî’ vistbi dewre û armanc kerdbi ke gerîlayan, PKK û şarê ma tasfîye bikera. Hema zî dewleta tirke vana ke ‘Ma do gerîlayan biqedîna.’ Na rewşa dewlete vurîyaya rewşêka trajîkomîke.
2019 ra dima şerê giranî qewimîyayî. La peynî de ma xeylêk çîyî vistî destî. Doktrînê şerî de rîpelêko newe ame afernayene. Dewleta tirke xeylêk îmkanê tekbolojîk û teknîkî vistî destî la gerîlayî reyna zî nêqedîyayî. Gerîlayanê azadîye tim hêvîya şarî gir kerde. Bi taybetî 2024 de gerîlayan îsbat kerd ke ê do nêqedê.
Dişmenî xeylêk xayîn, ajan û hêzê PDKyî antî kişta xo, her metod û tewirê çekan şuxilnayî. Bolu, Kayserî, Foça ûsn ra tugayî şawitî waranê gerîlayan. La dişmen Zap de bin kewt. Perfomansanê gerîlayan kerd ke şensê dewleta tirke do nêmano. Dewleta tirke se kena wa bikera do bi gerîlayan nêeşka.
Dewleta tirke tewr peyên Bexdad û Hewlêr de pêvînayîşî kerdî. Nê pêvînayîşî zî seba tasfîyekerdişê gerîlayan ameyê kerdene. Dewleta tirke vana ke înan dewleta Iraqî ra sozî girewtê. Dewleta tirke seba ke PKKyî sey astengîye vînena wazena ma tasfîye bikera. La planê ci yo sereke îşxalê pêro Kurdîstanî yo. Eke PDK û Iraq vera ney nêvejîyê dewleta tirke narey do biba belayê sereyê înan.
Dewleta tirke wazena Iraqî bianca kişta xo, Sûrîye tewra şerî bikera û bi nê hawayî kolonyalîzmê xo hîra bikera. Iraqî vatbi ke ê PKKyî sey rêxistinêka terorî nêvînenê la rêxistinêka teberê qanûnan vînenê. Dewleta tirke no çi televîzyonan de sey mijdanîye dayo. La çîyo winayên zî est o ke xora ma qetî xo rêxistinêka goreyê qanûnan pênase nêkerdo. PKK qetî goreyê qanûnanê sîstemî tênêgêra. Ma goreyê qanûnanê azadîya şarî têgêrenê. Seba ma ney ra ber pêro çi teberê qanûnan de yo.”
