Endamê Konseya Rayberdîyî ya KCKyî Mustafa Karasuyî Medya Haber TV derojdem erjna.
Karasuyî Şehîdê Megna Gulane bi hurmet yad kerdî, Roşanê Karkeran ê 1ê Gulane Pîroz kerd û vat na roje bi keda pîle ameye destfînayene, ganî ma rêçê şehîdanê xo de wayîrê keda înan bivejîyê û têkoşînê hemparî xurtêr bikerê ke waştişê înan bêro caardene.
Mustafa Karasuyî bale ante rewşa Îmraliyî ser û nê vatî: “Rayberîye ser o 25 serrî yo tecrîdo giran est o ke nê 9 serranê peyênan de giranêr bi. Rayberîye hema pêvînayîşê xo yê verênî de
Mehkemaya Heqanê Merdiman a Ewropa (MHME) CPT û Konseya Ewropa berpirsîyar hesibnaybî. Înan no sîstem na ro. No sîstem hetê Amerîka û Ewropa ra ame ronayene. Xora înan Rayber Apo teslîm kerd. Ganî ma pê têkoşîn û tewirê xo zextê rayrapêroyîye biafirnê ke ma zor bidê MHME û CPTyî. Eke ma înan zaf teşhîr bikerê, zaf şirê înan ser ê mecbur manenê ke wezîfeyê xo bîyarê ca. Coka ganî kampayaya seba Rayberîye bêro xurtkerdene. Raşta zî dinya wayîrvejîyayîşo xurt est o. Wayîrvejîyayîşê Rayberîye do dahîna pîl bi. Xora cinîyî zafêr wayîrê ci vejîyenê. Cinîyê heme dinya vinênê ke Rayber Apo bi felsefe û teorîya xo tarîxê cinîyan ê raştî vejeno meydan, sîstemê camêrdê serdestî teşhîr keno. Coka cinîyî dahîna zaf wayîrê Rayber Apoyî vejîyenê. Rayberîyo ke cinîyî wina wayîrê ci vejîyenê zîndan de tepiştiş zehmet o. Bêşik heme merdimatîye wayîrê Rayberîye vejîyena. Wayîrvejîyayîşê Rayberîye meseleya pêro merdimatîye ya. No wayîrvejîyayîş do heme merdimatîye bipêşo. O wext do CPT do tewirê raştî ramojo. MHME do rolê xo kay bikero.
Rayber Apo bi têkoşînê winayênî do bibo azad. Nê hetî ra sere de kurdî ganî heme hêzê demokrasi û şarî wayîrê Rayberîye bivejîyê. Wayîrvejîyayîşê Rayberîye têna meseleya kurdan nê meseleya heme hêzanê demokrasîyî, heme merdimatîye ya. Rayber Apo bi fîkranê xo xizmetê heme merdimatîye keno.”
Karasuyî derheqê hêrişanê îşxalî yê dewleta tirke yê vera Kurdîstanî de zî nê vatî: “Hêrişî dewam kenê. Dahîna zaf zî do hêriş bikerê. Hêrişê Herêmanê Pawitişê Medya kenê, hêrişê Xakurkê kenê. Heta îhtîmal est o ke hêrişê Garê bikerê. Hêrişî do dewam bikerî la vera nê têkoşîn zî est o, wa no zî bêro zanayene. Wa çew mevajo qey senî ke Erdogan vano ez do dekewê û kewno de. Wina rehet nîyo. Sey qiseykerdişî rehet nîyo. No şerr o û fedaîyî înan
pêşwezî kenê. Ê wina rehet nêresenê hedefê xo. PDKyî şuxulnenê. PDKyî waşt tay cayan de aver şiro. Vera nê yeno vejîyayene. PDK nêeşkeno nê bikero. PDK wa nê bizano. Eke wina bikero aver şiro PDK eşkera ma vera xo anceno mîyanê şerî. Gerîlayî sebr kenê. Gerîlîyî dîkqet kenê la eke PDK bikewo yew ca cewabê xo do bîgêro. Wa nê bizano. Nuqtayêka sînorî est a. PDK zor dana nê. Eke zor bido xora cewabê xo bîgêro. Xora gerîlayan cewabê xo dayo, dano zî. Wa ma mevajê ma kenê û gerîlayî bêveng manenê. Cewabê xo do bîgêrê.”
