Hemserekîya Konseya Rayberdişî ya KCKyî badê qrarê Dewaya Kobanê eşkerayîye daye. KCKyî cezayê ke ameyî dayene şermezar kerdî û vat nê qerarî ratşîya AKPyî fînaye çiman ver.
Eşkerayîye de nê ameyî vatene: ”Dewaya Kûmpasî ya Kobanê de ya ke semedê tesfîyekerdişê sîyasetê demokratîkî ameye aekrdene ke leteyêkê sîyasetê qirkerdişê kurdan a, cezaya girane dîyaye îdarekar û endamanê HDPyî û sîyasetmedaran. Sîstemê AKP-MHPyî yo faşîst heqdar mehkum keno û sûcdaran serbest vera dano. No qerarêko skandal o. Bi na dewa reyna dişmenîya vera kurdan ameye dîyene. Eleqeya dewa bi huqûqî çîn o. La senî hetê şarî ra zî yena namekerdene no kûmpasê îqtîdarî yo. Dewaya Kûmpasî ya Kobenê bi temamî sîyasîye ya, dewaya qirkerdişî ya. Mehkemeya ke no qerar girewt, a zî mehkemeya qirkerdişî ya. Dewaya Kûmpasî ya Kobanê pîya bi şarê kurdî hetê komelê Tirkîya ra zî meşru nîna vînayene û na dewa ameya mehkumkerdene.
Îqtîdarê faşîstî yê AKP-MHPyî seba ke verê sîyasetê demokratîkî bîgêro, tesfîye bikero ke çareserîya meseleya kurdan û demokratîkbîyayîşê Tirkîya bikero asteng, na dewa akerde. Qerar zî bi nê waştişî ame dayene. Na dewa zaf muhîm a, eşkera mojnena ke tewirê vera şarê kurdî û meseleya kurdan û demokrasîyî senî pêbesteyê. Îqtîdarî semedê qirkerdişê kurdan Tirkîya arde yew hale ke tede bi nameyê huqûq, edaletî çîyêk nêmend. Welat kewto binê hakîmîyetê çete, mafya û paştgêranê îqtîdarî. Komel zî neçar o. Her roje dahîna eşkera yeno vînayene ke peynîya nê do dahîna bibo xirab û herkes binê de bimano. Coka ganî kam ke azadîye û demokrasî wazeno, hêzê xo bikero yew.’
Bi Dewaya Kûmpasî ya Kobanê reyna muhîmîya têkoşînî vejîyaye meydan. Ganî sîyaseto demokratîk û hêzê demokrasîyî yewîye û paştdayîşê xo xurtêr bikerê. Semedê rijnayîşê faşîzmî ganî têkoşîno hempar bêro xurtkerdene. Ganî hêzê şorişgêr û demokratîkî têkoşînê yewbîyayeyî xurtêr bikerê. Ganî qet hêzêko xo sey muxalefetî hesibneno paştî medo sîyasetê AKP-MHPyî. Îqtîdaro faşîst vera şarê kurdî, şaranê Tirkîya, ameyoxê komelî, demokrasî, azadîye û huqûqî tim halê şerî de yo. Vatişê nermbîyayîşî bi temamî semedê xapînayîşî yo. Bi qerarê Dewaya Kûmpasî ya Kobanê AKPyî raştîya xo mojna ra. Tewirê vera kurdan û sîyasetê demokratîkî eynî wextî tewirê vera Tirkîya û demokrasîyî yo. Mabênê înan de tekîlîya xurte est a ke nîna qerfîyayene. Ganî her kes bi nê zanayîşî têkoşînî xurtêr bikero.”
