Hemserekê Şubeyê 2yînî yê Egitim-Senî yê Amedî Serhat Kiliçî derheqê babete de ANFyî rê qisey kerd.
Serhat Kiliçî bale ante ser ke seba dersanê kurdkî 10 mamostayî zaf kêm ê û vat: ”Na hûmare komîk a. Nê welatî de 30 mîlyonan ra zafêr kurdî est ê la 10 mamostayî tayîn benê. Na kerde nêzdîbîyayîşê dewlete yê bi kurdan eşkera keno. Kurdkî dibistanan de xora sey dersa weçînite yena dayene yanî bi hawayêkê fermîyî nêna qebulkerdene. Nê prosesî de zî dewlete bi bahaneyanê ‘kadroyî çin ê, mamostayî çin ê’ weçînîyayîşê kurdkî asteng kena. Goreyê ma perwerdeyê bi ziwanê dayîke ganî bêro dayene û goreyê ney mamostayî bêrê tayînkerdene.
Kurdî tim ziwanê xo yê dayîke ra dûrî ameyî vistene. Nika domanê ma hinî bi hawayêkê kêmî bi kurdkî ciwîyenê. Heta ke polîtîkaya perwerdeyî û nêzdîbîyayîşê dewlete wina dewam bikerê ma bi bawer ê ke çîyêk raşt nêbeno. Prosesê perwerdeyê bi ziwanê dayîke prosesêko zehmet nîyo. Ma sey komelî ney rê amade yê. Ziwan ameyoxê komelî yo. Ganî ma wayîrê ziwanê xo vejîyê. Ma xêrê ziwanî ra eşkenê estbîyayîşê xo bipawê. Waştişê ma yo bingeyîn oyo ke ganî perwerde bi ziwanê dayîke bêro kerdene.”
