Hemserekê Konseya Rayberdişî ya KCKyî Cemîl Bayikî derheqê rojdemî de erjnayîşî kerdî. Beşê diyînî yê roportajê Bayikî ra tay noqtayê girîngî wina yê:
”Ciwanê kurdî ganî bi temamî vera sîstemî vejîyê, teberê sîstemî de cabigêrê. Seba azadîya şarê kurdî ganî ciwanî serkêşîye bikerê. Xora têgêrayîşê ma serkêşîya ciwanan de ronîya. Ganî ciwanê kurdî bi ruhê şorişgêrî têbigêrê. Dewlete seba ke ciwanî tewrê gerîlayan nêbê û goreyê sîstemî têbigêrê mîyanê înan de fuhuş, madeyê tîryakî, ajanîyê ûsn. vila kena. Na babete de ganî keyeyî wayîrê domananê xo vejîyê û nêverdê ke ciwanê înan bixapîyê. Ganî ciwanî her ca de têkoşîn bikerê, tewrê gerîlayan bibê û aktîf bibê. Ganî ciwanî têgêrayîşê ma xo rê bikerê esas.
Ciwan û domanî ameyoxê ma yê. Coka dewleta tirke nînan kena hedef. Kurdîstanî ra ber cayêkê bînî de her roje domanî bi panzeran yenê kiştene? Na kerdene bi xo dişmenîya dewlete eşkera kena. Hêzê dewlete kuçeyan de bi panzeran şinê domananê ma ser. Hetê bînî ra dewlete cinî û ciwanan rê koçberîye, xizanîye, ajanîye, arabesk, berhemanê xo yê sey fîlman û muzîkî, fuhuş û madeyanê tîryakî ferz kena. Dewlete nêverdena ke tîyatroyê bi kurdkî bêro kaykerdene. Bi nê hawayî dewlete kena ke cinî û ciwanan asîmîle bikera û kulturê înan ra dûrî bivisna. Cinî û ciwanî vera nê kerdişan ganî bi xurtî wayîrê kultur û ziwanê xo vejîyê.
Dewleta tirke ya faşîste qestî ra tim hêrişê xoza û cografyaya Kurdîstanî kena û erdê Kurdîstanî talan kena. Çîyo ke Îlîç de qewimîyayo her kes zaneno. Şirnex, Gabar, Colemêrg, Dêrsim de talanêko pîl est o. Dewlete awa Kurdîstanî herimnena, daranê ci birnena û vêşnena. Şarê ma ganî bi têkoşînê ekolojîkî wayîrê erd, cografya û xozaya xo vejîyo. Dewlete seba ke talanê Kurdîstanî binimna kena ke têgêrayîşanê ekolojîkan zî biancê xo hetî. Seba ney zî PKKyî kena bahaneya xo û şovenîzmî kena. Kurdî ganî dewlete ra yew xeyrî mepawê, biewnê çareya xo ra. Çunke dewlete dişmen a.
Başûr de Barzanîyî propagandaya ‘PKK statuyê Başûrî çin keno’ kenê. La ma ney PDK-Barzanîyî ney keno. Barzanîyan qederê xo besteyê AKP-MHPyî kerdo. Tay sebeban ra PDK wazeno ke weçînayîşanê Başûrî taloq bikero; çunke înan îxanetê pêro kurdan kerdo û no teşhîr bîyo. Barzanîyî zanenê ke weçînayîşan de sey Erdoganî ê zî do bin bikewê. Eke Barzanîyî bin bikewê Erdogan zî do bin bikewo. Barzanîyî teyna xo kenê zengîn, xizmetê şarî nêkenê. Şarê Başûrî vêşan o, xizan o. La Barzanîyî tim hîna zengîn benê. Barzanîyî vanê ke weçînayîşî wa peynîya serre de bêrê kerdene. Çira? Çunke Erdoganî vato ke leşlerê tirkî do Başûr de hîna zaf vila bibê. Barzanîyî û Erdogan yew bernameyî anê ca. Eke Barzanîyî weçînayîşan de bin bikewê planê înan zî do biherimîyê. Şarê Başûrî yê welatperwerî Behdînanî ra heta Soranî bedelî dayî. Pêşmergeyî seba ke PDK û Barzanîyî xizmetê dewleta tirke bikerê û Başûrî bikerê şaristanê tirkan şehîd nêbîyî. La nika Barzanîyî şarê Başûrî rê îxanet kenê. PKK statuyê Başûrî paweno û do bipawo. Seba ney PKKyî zaf şehîdî zî dayî. Êyê ke azadîya Rayber Apoyî nêwazenê, wayîrê gerîlayan nêvejîyenê, îşxal û îxanetî rê veng nêkenê welatperwer nîyê. Ganî kurdî wayîrê erj û krîteran bibê. Welatperwerîye bi vervejîyayîşê îşxal û îxanetî û bi wayîrvejîyayîşê erjan bena. Ma venga pêro welatperweran danê ke nê esasî ser o têbigêrê.”
