Endamê Dayîreyê Têkilîyanê Teberî yê Îdareyê Xoserî yê Rojawanê Kurdîstanî Xalid Îbrahîmî derheqê keyeyanê endamanê DAIŞî yê Kampa Holî de ANFyî rê qisey kerd.
Îbrahîmî vist vîrî ke Îdareyê Xoserî têkoşînê vera DAIŞî de pêro mesuldarîyê xo ardê ca û vat: ”2019 de hetê cografîkî ra DAIŞ herême de ame binvistene. La hetê rêxistinî û îdeolojîya xo ra DAIŞ hema gandar o. Coka operasyonê ma yê vera hucreyanê DAIŞî dewam kenê.”
Îbrahîmî da zanayene ke Kampanê Hol û Roje de bi hezaran cerg û keyeyanê DAIŞî est ê û vat: ”Kampa Holî sey bombayêke destê ma de yo. Îdareyo Xoser bi îmkananê xo keno ke kampe de serwer bibo la zehmetîyanê pîlan anceno. Na mesuldarîye ganî teyna milê Îdareyê Xoserî de nêbîyêne. Ganî komelo mîyanneteweyî zî mesuldarîyanê xo bîyaro ca. Ganî DAIŞ set meseleyêka terorî ya mîyanneteweyîye bêro ercnayene.”
Îbrahîmî ard ziwan ke Kampa Hol û Roje de cergê DAIŞî yê hemwelatîyê 50 dewletan est ê û vat: ”Ma kenê ke tesbît bikerê ke nê kesî hemwelatîyê kamyew dewlete yê. Zehmetîyê ma zaf ê. Senî ke seba şerê vera DAIŞî de Koalîsyono Mîyanneteweyî amebi awankerdene ganî nika zî seba agêrayîşê keyeyanê DAIŞî koalîsyonêko winayên kom bibo. Teyna bi nê hawayî meseleya DAIŞî çareser bena. Ma cara şerê vera DAIŞî de 12 hezar şehîdî dayî. Îdareyo Xoser wazeno ke cergê DAIŞî mehkemeyanê mîyanneteweyîyan de bêrê muhakemekerdene. Ancî keyeyê şehîdan qayîl nîyê ke endam û keyeyê DAIŞî kampanê ma de bimanê. Çunke ê zî dejenê. Coka Îdareyo Xoser gêreno ke na mesele komelê mîyanneteweyîyî reyde çareser bikero.”
