Hemsereka Partîya Herêmanê Demokratîkan a Amedî Sultan Yaraye derheqê polîtîkayanê şerê taybetî yê dewleta tirke de ANFyî rê qisey kerd.
Yaraye da zanayene ke polîtîkayê şerê taybetî yê îqtîdarê AKP-MHPyî heman wextî de ê dewlete yê û vat: ”Vera cinî û ciwanan û şarê ma hêrişê topyekûnî est ê. Xîret yeno kerdene ke komelêko wina bêro afernayene ke nêeşko bifikiro, xo rêxistin nêkerdo. Xîret yeno kerdene ke mezgê komelî bêro destvistene. Wextê peyênî de serebûtê xokiştişî, şuxilnayîşê madeyanê narkotîkî zêdîyayî. Dewlete vana ke ‘ciwanî heta ke sere wedarnê wa wina bibê.’ Ma kenê ke ney teşhîr bikerê. Seba xelisnayîşê ciwananê xo ganî ma hîna zaf bixebitê.”
Yaraye bale ante polîtîkayanê şerê taybetî ser û vat: ”Bi taybetî vera keyeyanê welatperweran hêrişî yenê kerdene. Dewlete wazena ke nê keyeyî koç bikerê. Na babete de mesuldarîyê pîlî kewenê milê şaredarîyanê ma ser. Ma vera sîstemî xo çendek xurt bikerê û têkoşîn bikerê hendê do ser bikewê. Ganî ma nê hêrişan têkoşînêkê topyekûnî bikerê.”
