Endama Konseya Rayberdişî ya KJKyî Çîgdem Dogu bernameyê Xwebûnî yê JIN TVyî de qalê sîstemê serdestîya camêrdan kerd.
Qiseykerdişê Çîgdem Dogu ra tay noqtayê girîngî wina yê:
”Faşîzm destpêkê tarîxî ra nata est o. La wextê Mussolini, Hitler û Francoyî de yanî seserra vîstine de faşîzm hîna giran dîyabi. Tarîxê serwerîye û ê faşîzmî yew o. Serwerîye hêverî bi camêrdan dest pêkerd. Xora camêrdan pêro şiklanê serwerîyan ê sey îqtîdar, dewlete ûsn. de serkêşîye kerde.
Camêrdîya îqtîdarî faşîzmî awan kena. Wexto ke serwerîya camêrdan dest pêkerd, cinîyî xurt bîyî. Wexto ke îqtîdarî vejîyayê werte înan cinîyî xo rê sey dişmenî dîyî. Coka îqtîdaran kerd ke cinîyî bêhêz bibê. Hêverî cinîyê zanayeyî ameyî qetilkerdene. Sîstemê kapîtalîzmî zî cinîyê serkêşî, muxalîf û rêxistinbîyayeyî xo rê kerdî hedef. Yanî raştîye de faşîzm û camêrdîye heman kokî ra yê.
Her roje cinîyî yenê qetilkerdene. Ma vînenê ke partîyê raştgîrî pêro dinya de ancî yenê îqtîdaran ser. Sîstem tim xo ra barêke dano camêrdan, înan weye keno. Hişmendîya faşîzmî îqtîdaranê xo de cinîyan red kena.
Ganî camêrdatîye bêra sualkerdnee. Ganî bêro perskerdene ke gelo camêrdî nêeşkenê xo bivurnê. Heyf ke na babete de têgêrayîşê sosyalîst, çepgîr û anarşîstî zî qels ê. Ma eşkenê seba welatperweranê ma zî heman çî vajê. Wexto ke Jîna Emînî amebî qetilkerdene serewedaritiş de camêrdan zî cagirewt. La no bi xo bes nêkeno. Ganî camêrdê welatperwerî xo bivurnê, camêrdîya xo ya serwere bikişê.
Vurîyayîşê camêrdan bi rêxistinîya cinîyan a xurte eleqedar o. Cinîyî çend azad bibê camêrdî hende eşkenê bivurîyê. Coka ganî cinîyî rêxistinîya xo her hetî ra aver berê, xurt bikerê. Seke ma vatbi faşîzm û camêrdîye yew kokî ra yê. La cinîyî bi têgêrayîşêkê rêxistinbîyayeyî eşkenê sîstemê faşîzm û dewlete yê camêrdan werte ra wedarnê.
Rayber Apoyî tim vatêne ‘Ez qetî nêbîya camêrd. Mi nêwaşt ke ez biba camêrd. Camêrdîye serwerî ya. Mi camêrdîya xo kişte.’ Ganî camêrdî xo serwerîya cînsîyetê xo ra dûrî bikerê.”
