Mayê Şemeyî siba do Meydanê Galatasarayî yê Taksîmî de çalakîya xo ya hewteyê 1000inî bikerê.
Rixmo ke Mehkemeya Qanûnê Bingeyîyî bire dabî ke astengkerdişê çalakîya Mayanê Şemeyî binpaykerdişê heqanê merdiman o her hewte Mayê Şemeyî raştê destbendkerdiş û îşkenceyan yenê.
Mayanê Şemeyî ra Masîde Ocaka ke amadekarîya çalakîya hewteyê 1000inî kena ANFyî rê qisey kerd.
21ê adara 1995î de birayê Masîde Hesen Ocak dima ke amebi destbendkerdene dîyabi vînîkerdene. Keye û embazanê Ocakî heman roje seba ey dest pê çalakîye kerd. A roje ra dima cuya înan zî vurîyaye.
Masîde wina qalê ê rojan kerd: ”Birayê mi Hesen mamosta bi, seba ke nêamebi tayînkerdene Beyazit de çayxaneyêk akerdbi. 21ê adare de ey dadîya mi rê telefon kerd ke o do şan masêyan bîyaro. Dadîya mi a roje pabeyê ey bi la Hesen nêame. Ma fam kerd ke çîyêko xirab qewimîyeno. Ma nêweşxaneyan ra gêrayî û roja bîne zî şîyî Mudirîya Polîsan a Stenbolî. 30ê nîsane de ma rayaumûmîye rê îlan kerd ke Hesen çin o. O çax rixmê îfadeyanê şahîdan zî ame înkarkerdene ke Hesen ameyo destbendkerdene.
58 rojan ra dima ma cenazaya birayê xo, Goristanê Bêkesan ê Altinşehîrî de dîye ke tede rêçê îşkenceyî est bîyî. A roje ra nata ma seba edaletî têkoşîn kenê. Hesen ma rê hem bira hem zî embaz bi. Ey keye de bi tembur û vengê xo tim deyîrî vatêne. Ma hêvî kenê ke kesê vînîbîyayeyî do bêrê dîyene û edalet do bêro caardene. Eke no bêgorverdayîş û bêedaletîye biqedê şînê ma zî do biqedo. Seba ney têkoşînê ma tim do dewam bikero.”
Masîde Ocak da zanayene ke rixmê qedexe û hêrişan ê wazenê hewteyê 1000inî de zî çalakîya xo bikerê. Masîde vat: ”Ma wazenê bê ablûqaya polîsan, bê sînordarkerdişê bi des çalakîkeran û bê astengîyan çalakîya xo bikerê, çalakîye de qisey bikerê. Ma hinî nê kerdişanê xiraban ra aciz bîyî. Ma wazenê keye û merdimê kesanê vînîbîyayeyan Meydanê Galatasarayî de bêrê pêser û fotografanê ê kesan abikerê.”
