Konseya Demokratîk a Kurd a Fransayê (CDK-F) û Komeleya Çand û Hunerê ya Kurdistanê (ACK) îsal Mîhrîcana Çanda Kurd a Parîs li dar xistin. Mîhrîcana ku ji 25’ê Gulanê dest pê kir wê heta 1’ê hezîranê dewam dike. Weqfa Danielle Mitterrand, Şaredariya Parîsê, Şaredariya Herêma 10’emîn a Parîsê, Şaredariya Mant Le Jolie û Şaredariya Montreûilê jî piştgiriyê didin mîhrîcanê.
Di hefteya ku wê li Parîs û bajarên herêma Île-de-France bê lidarxistin û gelek mînakên mîrateya dewlemend a kurdan wê werin pêşandan, çanda kurdan a di bin gefê de ye wê were nasandin û li dijî asîmîlasyona çandî peyam were dayîn.
Di mîhrîcanê de bang li civaka kurd a li Fransayê û bi taybet li Parîsê hate kirin ku çanda xwe nas bikin û gelên din ên li Fransayê ji bo naskirina Kurdan ku yek ji gelên herî kevn ên Mezopotamyayê ye, vexwendin mîhrîcanê.
Bi mîhrîcana ku ji aliyê CDK-F û ACK’ê ve tê lidarxistin, qada çandî ya civaka Kurd a li çar parçeyên Kurdistanê derdikeve pêş. Ji bo aramî, geşepêdan û bextewariya gelê Kurd ên li Fransayê ne; ji bo avakirina diyalogeke domdar û avaker di navbera Kurd û gelên li Fransayê de, tê xwestin ku têkilî bê danîn.
Di mîhrîcanê de bernameyeke dewlemend û cihêreng wek performansên hunerî, konserên kolanan, dîwana dengbêjiyê, atolyeyên hunera destan, xwarinên urd wê bê pêşkêşkirin. Her wiha dê ji bo zarokan atolyeyên lîstikan bên organîzekirin û ji bo fêrbûna ziman, muzîk û govenda kurdî derfet bê dayîn.
Mîhrîcana Çanda Kurd a Parîsê ku bûye çalakiyeke kevneşopî, ji bo Kurdistaniyên li dîaporyê dimînin û gelê Fransayê bi kelecan li benda wê ne. Mîhrîcan îro saet di 14.30 de bi meşekê ji Navenda Çanda Ahmet Kaya ya Parîsê destpê kir. Piştî meşê belgefîlma ‘Yêk’ a ku derhêneriya wê Rojda Shîkho kiriye wê bê pêşandin. Roja ewil a mîhrîcanê dê bi performansa ‘perkusyon’ bi dawî bibe.
Di roja dawî ya mîhrîcanê de dê bi beşdariya Koma Amed, Chopy û Deza Amed konser bê lidarxistin.
