Bajarokê Perî yê Mazgîrtê Dêrsimî de do weçînayîşî bêrê newekerdiş û ji weçînayîşan rê demêk kilm mend. Partîya Têduştî û Demokrasîyî yê Şaran (DEM Partî) 16ê Gulane de start da xebatanê xo. 16ê Gulane ra heta nika DEM Partî xebatanê xo bi namzetanê xo Nacîye Aslan û Orhan Çelebî reyde dewe bi dewe tax bi taxe kena. Endama Meclîsê DEM Partî Beybûn Aslan derheqê prosesî de qisey kerd. Beybûne prosesê weçînayîşî ercna.
Beybûne dîyar kerd ke wexto ke verê qeyûm tayînê Perî bî û vat, do şarê Perî newe ra îradeyê xo bigîro. Beybûne wina dewam kerd: “Ma keye bi keye gêrayî, me lazimî, rexne û pêşnîyazîyê şarî goşdarî kerd. Pêvînayîşê ma kerdî de şarî nêrazîbîyayîşê xo yê hemverê qeyûman de ard ziwan. Sewbîna rewşêke tersî zî est a. No zî wina yo, ‘Eke DEM Partî serbikewo do qeyûm bêro tayînkerdiş’. Nika şaredarî destê AKPyî de ya. Hetê CHPyî ra vatişê ‘Eke DEM Partî serbikewo do qeyûm bêro tayînkerdiş’ yeno vilakerdiş.”
‘Do pratîkê CHPyî nêdê qezenckerdiş’
Beybûne dewam de dîyar kerd ke şar bi qerar o la semedê vatişê partîyê bînan qesawet awan bîyo û wina ard ziwan: “Pêro partîyê bînî serê DEM Partîye xo de awan kenê. Xo sey wayîrê tîya vînenê. Ma serdayîşê şarî de wina vanê, ‘nameyê AKP û MHPyî qeyûm bixo yo’. Rast o qeyûm tayîn kerdî. Seba nê her tewir kayê lêşin kay kerdî. Partîya CHPyî zî eynî ya. CHP mîyanê şarî de vano ma berpirsîyarîyê komelî gênê. Ma zanê pratîkê CHPyî xapinayîş ê. Seba berjewendîyê xo şarî xapênenê.”
‘Seba ameyoxêk azad..’
Beybûne tewr peyîn wina vat: “Her tim her prosesî de bi îrade, vindertiş, fikr û ewnîyayîşê cinîyan vuryeno. Sîyasetê têduştî û demokratîke cinîyan reyde eşkeno bêro awankerdiş. Ez venga pêro cinîyan kena. Wa a roje wayîrê îradeyê xo vejîyê. Wa şarê Perî 2yê hezîrane de şêro serê sindoqan û wayîrê îradeyê xo vejîyo. Ma seba ameyoxêk azad wayîrê îradeyê xo vejîyê.”
