Rêberê Gelan Abdullah 26 sal in di bin tecrîda mutleq de li Îmraliyê tê ragirtin û 39 meh in qet agahî ji Rêber Apo nayê girtin. Desthilata faşîst AKP-MHP her carê 6 meh cezayê qedexekirina hevdîtinê didin. Hevberdevkên Komîsyona Hiqûqê ya Partiya Demokrasî û Wekheviyê ya Gelan (DEM Partî) Sevda Çelîk Ozbîngol û Ozturk Turkdogan ji bo karibin Rêber Apo re hevdîtinê bikin serlêdan kirin.
Sevda Çelîk Ozbîngol û Turkdogan di daxwaznameyê de qala tecrîda giran a li Îmraliyê hate kirin û ev daxwaz kirin: “Dawî li polîtîkaya qutkirina têkiliya bi temamî bê anîn ku li Girtîgeha Îmraliyê tê meşandin. Pîvanên hiqûqa gerdûnî bêne naskirin. Ji bo wasî, malbat û parêzerên Abdullah Ocalan û hikumxwarên din Veysî Aktaş, Omer Hayrî Konar û Hamîlî Yildirim karibin tavilê hevdîtinê bikin, bikevin nava hewldanên pêwîst. Weke Serokê Desteya Dadger û Dozgeran, têkildarî berpirsyarên tecrîda mutleq a li Girtîgeha Girava Îmraliyê ji bo destpêkirina lêpirsîneke îdarî û edlî bikevin nava hewldanan. Weke Hevberdevkên Komîsyona Mafên Mirovan û Hiqûqê ya DEM Partiyê, ji bo em karibin Abdullah Ocalan û hikumxwarên din Veysî Aktaş, Omer Hayrî Konar û Hamîlî Yildirim bibînin, destûr ji me re bê dayin.”
