Endamê Komîteya Rayberdişî ya PKKyî Murat Karayilanî bi wesîleya serrgêra 20. ya Hemleya 1ê Hezîrane ya ke 2004 de ameye îlankerdene, ANFyî rê qisey kerd.
Karayilanî 1ê Hezîrane sere de Rayberê Şarê Kurdî abdullah Ocalanî rê heme şarê kurdî û dostanê ci rê pîroz kerde, şehîdê Hemleya 1ê Hezîrane yad kerdî û nê vatî:
”Hemleya 1ê Hezîrane têkoşînê ma de wayîrê cayê muhîmî ya. Seke yeno zanayene Hemleya 15ê Tebaxe verê çînbîyayîşê şarê kurdî girewt û şarê kurdî newera ganî kerd.Hemleya 1ê Hezîrane ke ma eşkenê sey Hemleya 15ê Tebaxe ya diyîne bîgêrê dest, vera Komployê Mîyanneteweyî ameye destpêkerdene. Hemleyêka şorişgêre ya tarîxî ya. Bêşik serkêşê Hemleya 1ê Hezîrane zî gerîlayî. Prosesê ke bi hemleya 15ê Tebaxe dest pêkerdbi amebi merhaleya çarserkerdişê meseleya kurdan. La hêzanê hegenomîkan çareserkerdişê meseleya kurdan û xeta PKKyî semedê xo tehlukeyin dî. Coka Komployê Mîyanneteweyî ame kerdene. Bi nê komployî ame waştene ke kurdî û tirkî biverê pê la Rayber Apo bi stratejîya xorî verê nê komployî girewt.
Ma sey îdareyî o wext çîyo ke ma ra ameyêne pawitene ma nêard ca. Bêşik sebebê nê yê cîya cîyayî bibî. Tîya hewce nêkeno ma perûne îzah bikero. Mesele îdareyê ma nêeşka verê cehdkerdişê a koma tesfîyekare bîgêro. Coka xeta Rayberîye ra qerfîyayîşêk qewimîya. Seba ke têgêrayîş xeta Rayberîye ra bêro qerfnayene hêrişê eşkerayî ameyî kerdene. Vera na rewşe Rayber Apoyî talîmatê ronayîşê Komîteya Newera Înşakerdişê PKKyî da. Na çarçewa de serkêşîya na komîte de Heyetê Pêroyî yê Kongra Gelî yê 2. de qerarê Hemleya 1ê Hezîrane ame girewtene. Hedefê hemleye o bi ke têgêrayîş newera bêro pêser û xeta paradîgmaya Rayberîye de aver bero ke dewlete semedê çareserî mecbur bimano. Sere de çalakîyê wirdî ameyî kerdene la dima nê çalakîyî xurtêr bîyî. 2007 de Hemleya ‘Êdî Bes e!’ ameye destpêkerdene. Serra 2009 de mabênê heyetê PKKyî û dewleta tirke de pêvînayîşî ameyî kerdene. Rayberîye û têgêrayîşî çareserî waştêne la AKPyî nê pêvînîyîşî sey taktîkê şerê taybetî şuxilnayî. 10ê Hazîrana 2010 de Stratejîya Şerê Şarê Şorişgêrî kewte dewre ke şar zî tede ca geno.
HPG merhaleyêka ewro tede yo deyndarê Konferansê Yewinî yê 2001î yo. Nê konferansî de qerarê newekerdişê gerîlayan ame girewtene. Reyna nê konferansî de tay gamê verênî ameyî eştene û qerarê neweyî ameyî girewtene. Rayber Apo dewrî raşt erjneno û goreyê ci qeraran geno. Gerîlayan çarçewaya nê qeraran de xo aver berd. 3 serrrî yo artêşa tirke ya îşxalkere Herêmanê Pawitişî yê Meyda de ameya vindarnaye û tîya têkoşîno tarîxî yeno dayene. Gerîlayêk bi felsefeya Rayber Apoyî têkoşîn kenê mojnenê ra ke şerî de merdim senî vera teknolojîya dewrî têkoşîn keno. Ewro têkoşîno ke Gerîlayê Azadîye yê Kurdîstanî danê têkoşînêko bêhempa yo. No şerêko newe yo ke ganî xeylêk hetan ra bêro cipersayene. Gerîlayê Azadîye yê Kurdîstanî na çarçewa de serra 40. ya 15ê Tebaxe û serra 20. ya Hemleya 1ê Hezîrane temam kerdî. Bêşik do her gerîlayê/a HPG û YJA Starî serra 21. ya Hemleya 1ê Hezîrane de rayraşîyayîşê sekrewtişî de morê xo bido binê serkewtişanê muhîman ro.”
