Hemserekîya Konseya Rayberdişî ya KCKyî derheqê hêrişanê dewleta tirke yê vera Rojawanî de eşkerayîye daye û nê vatî:
”Dewleta tirke ya qirkere reyna vera Rojawanî hêriş kerd, şar û hêzê pawtişî hedef girewtî, keye, wesayît û ekîbê weşîye hetê SÎHAyan ra ameyî pirodayene. Eşkerayîyan de ame vatene ke çar endamê QSDyî şehîd bîyî û 12 sîvîlî birîndar bîyî. Ma nê qirkerdişê dewleta tirke şermezar kenê, veng danê ke wa her kes vera nê hêrişan tewir bîgêro.
Nê hêrişî wextê bewlîkerdişê weçînayîşanê Rojawan de ameyî kerdene. Wextêk o şefo faşîst Tayyip Erdogan û vervatoxê îqtîdarê ci vanê ê do weçînayîşan medê kerdene. Dima no qirkerdiş ame kerdene. Reyna eşkera ame vînayene ke Erdogan û îqtîdarê ci nêwezanê Rojawan de şar derbanê xo bipêşo û bireso sîstemêkê demokratîkî. Îqtîdarê AKP-MHPyî yo ke dişmenê kurdan o, bi şerî xo weye keno. Coka keno ke Rojhelatê Mîyanênî de şer dahîna bibo xorî û vila bo. Îqtîdaro faşîst keno şerê Rojhelatê Mîyanênî ser o sîyasetê qirkerdişê kurdan rayra bero. Heme hêrişê vera Rojawanî bi nê zîhnîyet û sîyasetî yenê kerdene.
Tayyip Erdogan û îqtîdarê ci yê ke Vakurê Kurdîstanî de bi qeyûman îradeyê şarê kurdî xesp kenê, Rojawan de zî kenê ke verê îradebîyayîşê kurdan bîgêrê. Na çarçewa de hêriş kenê. Çunke Erdogan û îqtîdaro faşîst her ca de dişmenîya kurdan kenê. Nê hêrişan reyna dişmenîya înan fîna çiman ver. Ganî hêzê Kurdîstanî yê welatperwerî vera nê zîhînîyet û sîyasetê qirkerî pîya têbigêrê, hemkarîye û xayînîye teşhîr bikerê û têkoşîn û xoverdayîşî esas bîgêrê. Sere de şarê Rojawanî ganî heme şarê Sûrîye vera hêrişan îşxal û qirkerdişî yê dewleta tirke pîya têbigêrê. Şarê bindestî yê dinya û hêzê demokrasîyî zî ganî paştî bidê Şorişê Rojawanî. Ma veng danê ke wa vera hêrişan her kes hîsgêr û berpirsîyarîya xo bîyaro ca.”
