Rejîma Îranê di van demên dawî de zextên li ser kurdan dijwar kiriye. Mamostaya zimanê Kurdî Sewsen Mihemed Zade roja 15’ê gulanê ji aliyê hêzên Îranê ve li bajarê Bokan a rojhilatê Kurdistanê bi lêdanê hat binçavkirin. Heta niha jî malbat û parêzeran nekarîne hevdîtinê li gel Sewsen Mihemed de bikin û hat gotin ku Sewsen li girtîgehek ya Îtalaetê ya li Urmiyeyê ye.
Tora Mafê Mirov a Kurdistanê ragihand ku ji dema Sewsen Mihemed hatî binçavkirin ve tenê carek peywendiyek kurt a telefonî li gel malbata xwe de çêkiriye û ji malbatê re gotiye ku ew li girtîgehek takekesî ya li navendek ewlehiyê ya Urmiyeyê dimîne.
Li gor heman agahiyên ku Tora Mafên Mirov belav kiriye, çend caran malbatê ji bo zanîna çarenûsa keça xwe serdana dadgeh û navendên ewlehiyê yên Bokanê kirine, lê ti bersivek zelal nedane malbatê.
Sewsen Mihemed Zade 17 sal in li nava bajêr û gundên derdorê waneya zimanê kurdî dide. Gelek caran ji aliyê hêzên ewlehiyê ve îfadeya wê hat girin û lêpirsîn lê vekirin.
