Têgêrayîşê Azadîya Cinîyan ê Êzidîyan (TAJÊ) 8ê adare de kampanyaya ”Vera Qirkerdişê Cinîyan Bibê Vengê Xopawitişî” dabî destpêkerdene. Endama Komîteya Dîplomasî ya TAJÊ Suhame Şengalî derheqê kampanyaya înan, polîtîkayanê PDKyî û girîngîya ferasetê xopawitişî de ANFyî rê qisey kerd.
Suhame Şengalî ard ziwan ke kedêka pîle ya şerwananê YPG û YPJyî xelisnayîşê esîran de est a û vat: ”YPG û YPJyî seba xelisnayîşê esîran, şerê vera DAIŞî de zaf şehîdî dayî. HSDyî zî dima Kampa Holî ra zaf cinîyê esîrî xelisnayî. Hema zî herêmanê îşxalkerdeyan ê sey Serêkanîyê, Îdlîb û Efrînî de cinîyê êzidîyî yê esîrî est ê. Beşêkê înan zî derbazê Tirkîya ameyo kerdene. Ma nêeşkenê hûmarêka zelale bidê ke çend êzidîyî destê DAIŞî de yê.”
Suhame da zanayene ke esîrê ke ameyê xelisnayene Şingal de bi coşî yenê pêşwazîkerdene la PDK vera nînan polîtîkayêka lêşine ano ca. Suhame vat: ”PDK nêwazeno ke cinîyê êzidîyê ke DAIŞî ra xelisîyayê Şingal de bimanê. Senî ke nê kesî resenê Şingalî PDK keyeyanê înan de têkilîye nano ro û wazeno nînan bişawo mektebanê Nêçîrvan Barzanîyî. PDK wazeno cinî û domanan erdê înan ra dûrî bivisno. Bi nê hawayî PDK keno ke wina bimojno ke nê kesî hetê înan ra ameyê xelisnayene. PDK wazeno Şingalî veng bikero. Sîyasetê PDKyî sîyasetê DAIŞî ra cîya nîyo. PDK keno ke îxanetê ci yê vera Şingalî vîr a bikero.”
Suhame bale ante kampanyaya TAJÊ ser û vat: ”Ma armanc kenê ke cinîyanê esîran bixelisnê û pawitişê înan bikerê. Cewherê kampanyaya ma xopawitiş o. Ma wazenê ferasetê xopawitişî cinîyan de aver berê. Çarçewa na kampanya de ma xeylêk waranê Rojhelatê Mîyanênî û enternasyonelan de xebatan kenê. Ma kenê ke kampanyaya ma ser bikewa û cinîyî bieşkê bi têkoşînê hemparî xo bipawê.”
