21ê Adara 2014ine de Partîya Demokratîke ya Şaran ê Nisêbînî se ra 85 rayîr girewt û dima ra hemşaredarî ameyî weçînayîş 11ê êlule 2016ine de qeyûm ame tayînkerdiş. Hemşaredare Sara Kaya 13ê Çeleyê 2017ine de ameye tepiştiş û 9ê gulane de ameye tahliyekerdiş. Sara ke 7 serrî û nîm tepişte mende, 4ine dadgeha cezaya giran ya Mêrdînî de bi îdiayê endamîya rêxistine 10 serrî û 6 aşmî cezaya zîndanî dayî û tahliye bîye.
Sara ke dimayê tepiştişê demdergî vera dîya newe ra ameye Nisêbîn û polîtîkayê qeyûmî ercna.
Sara da zanayîş ke seba bajarê cinîyan Nisêbînî rê xizmet bikero bîya namzed û wina vat: “Nisêbîn cayêk zaf ziwanî, zaf kultur û rengîn o. Mi waştêne bajarê xo rê xizmet bikerî. Xeyalê mi seba Nisêbînî estbî. Vernîya mi de Ayşe Gokkane şaredar bîye. Dimayê aye zî şaredarêke cinî girîng bî. Viraştişê rayîrî ra zêdeyêr projeyê min ê seba cinî û tutan estbî. Çi heyf nê projeyê mi nîmced mendî.”
‘Wayîrvejîyayîşê şarî serê lingan de verdeno’
Sara ke 9ê gulane de vera dîya, bale ant serê zîndanan û wina vat: “Zîndanê hemverê xozaya merdimî yê. Merdim cuyêka îzole ciwîyenê. Merdimî bi serran binê tecrîdî de manenê. La wayîrvejîyayîşê şarî merdiman serê lingan de verdeno. Xeylêk çîyê ke merdim bikero est o la merdim esîr o. No çîyêk giran o. Bi polîtîkaya surgunî merdimî şirawenê cayê dûrî. Merdimî keye û heskerdoxanê xo ra dûr kewenê.”
‘Ganî şar cewabê lazimî bido’
Saraye polîtîkayê qeyûman zî ercna û wina vat: “2016ine de polîtîkaya qeyûman vejîya vernîya ma. Dewlete bi tayînkerdişê qeyûman hemverê qanûnê xo vejîya. Bi hîrê demî yo qeyûm yeno tayînkerdiş. Sey her cayî Tirkîya, kurdî îradeyê xo weçînenê. La çira tehemul nêkenê? Çira qeyûman tayînê şaredarîyê şarê kurdî kenê. Ganî pêro şarê ma hemverê polîtîkayê qeyûman vejîyê û wayîrê îradeyê xo vejîyê. Ganî nê qebûl nêkerê. Eke sûcek bibo wa dadgehî qerar bidê û meclîsê şaredarî zî kom bibê û newe ra hemşaredarê xo weçînê. La çi heyf no nîno kerdiş. Yewin amanc xespkerdişê îradeyê şarî yo. Ganî şarê ma cewab bido xespkerdişê îradeyê şarî û wayîrê şaredarîyan vejîyo.”
