Çarçewa Hemleya ‘Abdullah Ocalanî rê Azadîye, Meseleya Kurdan rê Çareserîya Sîyasîye’ de çalakîyî her roje zêdîyenê. Çarçewa na hemle de ‘Rojê Dîyaloganê bi Abdullah Ocalanî’ mabênê 15-22yê hezîrane de do bêrê serûberkerdene.
‘Rojê Dîyaloganê bi Abdullah Ocalanî’ welatanê Fînlandîya, Swêd, Fransa, Almanya, Katolanya, Yunanîstan, Îtalya, Swîsre, Kolombîya, Kibris, Belçîka, Îngilîstan, Polonya, Slovenya, Kenya û xeylêk welatan de do bêrê kerdene.
Nê çalakîyan de do qalê paradîgmaya Konfederalîzmê Demokratîkî ya Rayberê Şarê Kurdî Abdullah Ocalanî bêro kerdene, kitabê Ocalanî bêrê wendene, tecrîdê Îmraliyî ser o agahîyî bêrê dayene û aktîvîteyê sey panel, konferans, tîyatro, mîtîngî bêrê kerdene.
Endamanê Înîsîyatîfê Hemleya Azadîye venga pêro kesan da ke tewrê nê rojan bibê û fikranê Rayberê Şarê Kurdî vila bikerê.
Endaman bale ante tecrîdê Îmraliyî ser û vist vîrî ke dezgehê sey CPT û Mehkemeya Heqanê Merdiman a Ewropa vera tecrîdî erkanê xo nêanê ca.
Endamanê Înîsîyatîfî vat: ”Nuşteyê Abdullah Ocalanî seba entelektuel, aktîvîst, karker, zanyar, hunermend, sendîkagîr, sîyasetmedaran ûsn. çimeyê îstîfakerdişî yê. Ocalanî heta nika şaran ser o zaf tesîrî kerd. Fikranê ey ser o Rojawanê Kurdîstanî de îdareyêk ronîya. Ey hucreyê xo yê Zîndanê Îmraliyî de ferasetê ‘Jin, Jiyan, Azadî’ formule kerd û bi têkoşînê xo cinîyan rê bîyo pusula.”
