Dewleta tirk a dagirker bi hevkariya malbata sîxur Barzanî û çeteyên wê başûrê Kurdistanê dagir dike û bi êrîşên dagirkeriyê re sivîlan, rojnamevan, siyasetmedar şehîd dike. Dewleta tirk a dagirker herî dawî di 23’yê tebaxê de li navçeya Seyîdsadiq a Silêmaniyê ya başûrê Kurdistanê bi balafirên bêmirov wesayîta rojnamevanan bombebaran kir û rojnamevan Gulistan Tara û Hêro Bahadîn şehîd bûn. Rojnamevanên jin ên başûrê Kurdistanê şehîdkirina rojnamevanên jin axivîn.
Rojnamevan Peryan Ehmed, ewilî rojnamevan Gulistan Tara û Hêro Bahadîn bi bîr anî û wiha axivî: “Ez bejna xwe li ber şehîdan ditewînim, armanckirina jinan ji aliyê dewleta tirk a dagirker ve nîşaneya wê rastiyê ye ku ew çi qas ji hêza jinan û rê û rêbaza wan ditirse. Ez bi tundî rexne li desthilatdariya kurdî û wan sendîka û aliyan dikim ku li hember vê teror û komkujiyê bêdeng in û bertekê nîşan nadin. Em destnîşan dikin ku em ê her tim li ser rê û rêbaza rastî û heqîqetê berdewam bibin û rêya xwe winda nekin, em ê bersiva van êrîşan bidin û tola şehîdên xwe bistînin.”
Rojnamevan Bêrîvan Bergareyi jî diyar kir ku ev teror nikare bê alîkariya xeta xiyanetê pêk were û wiha got: “Em vê êrîşê şermezar dikin, ne gengaz e ku dijmin bê xeta xiyanetê bikare bi vî awayî wan bişopîne û me guman tune ye ku hevkariya dewleta tirk a faşîst tê kirin, dijmin wisa difikire ku em ditirsin, lê em qet natirsin û em ê rê û rêbaza şehîdên xwe bidomînin û ew ê bersiva me ji bo êrîş û kiryarên qirêj ên dijmin dê hebe.”
