Hilbijartina Parlamentoya Herêma Kurdistanê wê di 20’ê cotmehê de pê were. Derbarê amadekariyên şopandina hilbijartinê ya ji aliyê saziyên çapemeniyê û çavdêrên siyasî ve, Berdevkê Komîsyona Navendî ya Hilbijartina Parlamentoya Herêmê ya li Komîsyona Bilind a Hilbijartinên Iraqê Eyser Yasîn ji ajansa nûçeyan a Iraqê re axivî.
Eyser Yasîn diyar kir ku Komîsyona Hilbijartinê di hemû aliyan de ji bo pêkanîna hilbijartinê amadeye û wê îşev dema propagandya hilbijartinê bi dawî were. Eyser Yasîn diyarkir ku piştî propaganda hilbijartinê bi dawî hat, wê kelûpel û amêrên dengdanê li navendên hilbijartinê yên her çar parêzgehên Herêmê bên belavkirin. Eyser got ku li gor plana ku wan daniye wê ev kar di rojên 15,16 û 17’ê cotmehê de pêkwere.
Di beşek din ya axaftina xwe de Eyser Yasîn eşkere kir ku heta niha 13 hezar û 478 çavdêrên siyasî li gel 2 hezar û 100 çavdêrên navxweyî ji bo çavdêrîkirina proseya hilbijartinê navên xwe tomarkirine.
Di dewamê de Eyser Yasîn da zanîn ku wê nûnerên 13 konsolosxane û 17 rêxistinên navdewletî hilbijartinê bişopînin. Ji bilî wê jî wê 20 saziyên çapemeniya navdewletî û 48 saziyên çapemeniya navxwe hilbijartinê bişopînin.
Wê roja 17’ê cotmehê dengdana taybet û roja 20’ê Cotmehê jî dengdana giştî ji bo hilbijartina parlementoya Herêma Kurdistanê pêkwere. Hilbijartina vê carê wê ji aliyê Komîsyona Bilind a Hilbijartinên Iraqê ve were birêvebirin.
