Çeteyên dewleta Tirk la dagirker li dijî gelê kantona Efrînê û Şehbayê sûcên hovane û dijmirovahî pêk anîn. Şêniyên kantonê di dema koçberiyê de rastî sûcên mîna serjêkirin, kuştin, îşkencekirin, revandin û talankirina mal û milkan hatin. Îbrahîm Xelîl ê 60 salî yê ji bajarê Efrînê yê dagirkirî, du caran bi koçberiyê re rû bi rû ma. Carekê di sala 2018’an de ji bajarê xwe koçber bû û cara duyem jî ji Şehayê ku di 2’yê Kanûna 2024’an de ji aliyê dewleta Tirk û çeteyên wê ve hate dagirkirin. Îbrahîm Xelîl piştî ku bi darê zorê ji gundê Ehresê yê kantona Şehbayê derket, ew û malbata xwe derbasî Qamişloyê bûn.
Îbrahîm Xelîl diyar kir ku di 18’ê Adara 2018`an de em cara yekem ji Efrînê derketin û hatin Şehbayê, lê êş û azara koçkirina ji Şehbayê du qat bû. Xelî da zanîn ku çeteyên dewleta Tirk a dagirker (Artêşa Nîştîmanî) li Şehbayê ew dorpêç kirin, hinek ji şêniyan dîl girtin û hovîtî li wan kirin û wiha got: “Piştî ku çeteyên Artêşa Nîştimanî hatin wir, gefa kuştinê li xelkê xwarin, tirs kete nava xelkê. Çeteyan 2 jin ser jê kirin. Yek ji wan jinên ku hatine serjêkirin, navê wê Raniye ye û ya din jî hevjîna şofêrekî bû ku ez navê wê nizanim. Her wiha çeteyên dewleta Tirk a dagirker 3 birayên hev yên ji pêkhateya Ereb ên li Tilqirahê ser jê kirin. Çete ji Ezazê hatine û bi hinceta ku bi rêvebiriyê re dixebitin, ew her sê bira serjê kirin.”
Xelîl anî ziman ku ew bi darê zorê ji gundê xwe hatin derketin, çete ketin mala wî û talan kirin û şewitandin û wiha domand: “Berî şewitandina mala min, bi hinceta ku ez bi Rêveberiya Xweser re kar dikim, hemû tiştên malê dizîn. Çeteyan mal û milkên hemû xelkê wir talan kirin.”
